You are currently browsing the monthly archive for september 2006.
Ný kraftur tók við vínrýni Gestgjafans í nýjasta tölublaðinu sem kom út í vikunni, mæðginin Dominique og Eymar.
Það er okkur því sérstök ánægja að eiga fyrsta Vín mánaðarins hjá þessu nýja og öfluga vínteymi.
Castello di Querceto 2004 fær fjögur glös og heiðurstitilinn “Vín mánaðarins” að auki. Tvö önnur vín frá okkur fá þarna prýðiseinkunn, Laderas de El Seque 2005 frá Artadi víngerðinni færð 3 1/2 glas og Mas Nicot 2003 fær 3 glös.
Þar fyrir utan mæla þau þau með okkar vínum á tveimur stöðum í blaðinu. Með Chili rækjunum á bls. 63 mæla þau með ástralska Hermit Crab hvítvíninu frá d’Arenberg og með spænsku pylsu- og ólífusalati á bls. 60 mæla þau með Laderas de El Seque frá Spáni.
CASTELLO DI QUERCETO CHIANTI CLASSICO 2004 – 4 glös + Vín Mánaðarins
Þessi Chianti Classico er einfaldlega æðislegur. Sveitakeimurinn er það fyrsta sem maður finnur með tóna af kirstuberjum, leðri og anís í bakgrunninum – sannkallað hugleiðsluvín. Því miður gerist það allt of oft þegar svona vín, sem ilma yndislega, eru annars vegar að maður verður fyrir vonbrigðum þegar þau eru smökkuð. Ilmurinn býður upp á svo mikið en bragðið nær ekki að fylgja á eftir. Það er svo sannarlega ekki raunin með þetta vín þar sem bragðið heldur uppteknum hætti. Margslungið og kröftugt með þægileg tannín og fágaða byggingu. Prófið það með nauta-carpaccio, gröfnu kjöti og lambalundum.
Verð 1.790 kr. – Mjög góð kaup. Fæst í Heiðrúnu, Kringlunni og Hafnarfirði.
Okkar álit: Frábært þegar keimur samsvarar angan eins og hér, hrein unun frá upphafi til enda.LADERAS DE EL SEQUE 2005 – 3 1/2 Glas
Þetta er eina vínið frá Alicante sem er fáanlegt í Vínbúðunum og er það synd, ef dæma má af gæðum þessa víns. Af því er skemmtilega aðlaðandi ilmur sem einkennist af miklum og skemmtilegum ávaxtakokteil. En það er margt annað í glasinu og má þar einnig finna voitt af eik, jarðveg og ávöxt. Þetta er ungt vín og kraftmikið með góða byggingu en það eina sem vantar upp á er smáfylling og mætti ávöxturinn vera aðeins meira áberandi í munni eins og hann er í nefi. Það mætti prófa að umhella því. Þetta vín væri tilvalið með spænskum réttum, svo sem kryddpylsum og tapasréttum sem innihalda kjöt.
Verð 1.450 kr. – Mjög góð kaup. Fæst í Heiðrúnu og Kringlunni.
Okkar álit: Mjög þjóðlegt vín, virkilega aðlaðandi og gott matarvín. Eina vínið frá Alicante og skemmtileg viðbót frá Spáni
MAS NICOT ROUGE 2003 - 3 glös
Loksins eru vín frá Suður-Frakklandi að taka við sér og á síðastu mánuðum hefur úrvalið af þeim snaraukist í Vínbúðunum. Hér er á ferðinni hefðbundin Languedoc-blanda, GSM (Grenache, Syrah og Mourvedre), sem Ástralar hafa einnig verið að prófa með fínum árangri. Mas Nicot er svolítið lokað í nefi en opnast með tímanum í glasinu. Þar er að finna vott af þroskuðum ávöxtum, jafnvel sultuðum, marsípan og jarðveg. Þetta ár, 2003, var eitt það heitasta í lengri tíma og er sennilegt að það hafi mótað þetta vín. Mikil, en góð, tannín ráða ferðinni ásamt góðri sýru og ávexti sem gefur víninu ágætis jafnvægi. Prófið það með pörusteikinni og lambakjöti með sætu meðlæti.
Verð 1.450 kr. – Góð kaup. Fæst í Heiðrúnu og Kringlunni.
Okkar álit: Erfiður árgangtur af góðu víni – umhellið því.
- Gestgjafinn, 10. tbl. 2006.
Það er enginn einn guð (aka Robert Parker) á Ítalíu þegar kemur að víngagnrýni. Ábyrgðin dreifist á nokkrar vínbiblíur og sú áhrifamesta, Gambero Rosso/Slow Food útgáfan, heldur úti nefndum fyrir sérhvert hérað landsins sem veita viðurkenningar fyrir sitt svæði frekar en að stóla á smekk einnar persónu.
Æðsta viðurkenning Gambero Rosso eru glösin þrjú, TRE BICCHIERI.
Tre Bicchieri 2007 listinn var að koma út. Kíktu á hann.
Okkar framleiðendur eiga þarna nokkur vín: Barbaresco Starderi Riserva 2001 frá La Spinetta, Barbera d’Asti Superiore Bionze 2004 frá La Spinetta, Marciliano frá Falesco, Granato 2004 frá Foradori, St. Valentin Sauvignon Blanc 2005 frá San Michele Appiano, Ribeca 2004 frá Firriato, Montevetrano 2004, Flaccianello 2003 frá Fontodi, Collepiano 2003 frá Arnaldo Caprai og Plenio 2003 frá Umani Ronchi.
Ég veit ekki hvar þessar loftslagsbreytingar enda en mér líst ekki alveg á það.
Eins og er erum við ein þeirra þjóða sem myndi ekki kvarta yfir nokkrum plúsgráðum til viðbótar. Hvar það gæti endað hins vegar er annað mál.
Ætli við getum einhvern tímann ræktað ólífur, vín og te eins og Bretarnir?
Ég tók ekki viðtal við hann.
Þeir hjá l’Express í Frakklandi gerðu það.
Öll vín hefja feril sinn í aðeins tveimur vínbúðum, Heiðrúnu og Kringlunni. Þá kallast þau óbreytt reynsluvín en eiga möguleika á stöðuhækkun í kjarnaflokkinn ef þau seljast nógu mikið. Kjarnavín fá dreifingu í fleiri vínbúðir en formúla ræður því í hvaða og hversu margar búðir þau fara. Formúlan tekur flestar ákvarðanir en verslunarstjórar hafa líka eilítið svigrúm til að velja hvaða kjarnavín þeir vilja bjóða viðskiptavinum sínum upp á.
Við eigum 5 kjarnavín sem stendur. Hin fimm fræknu fást í þessum vínbúðum:
Casal di Serra (18 vínbúðir): Kringlunni, Heiðrún, Eiðistorgi, Smáralind, Hafnarfirði, Akureyri, Egilsstöðum, Dalvík, Hveragerði, Austurstræti, Holtagörðum, Stekkjarbakka, Spöngin, Dalvegi, Garðabæ, Keflavík, Mosfellsbæ, Selfossi.
Fontodi Chianti Classico (12 vínbúðir): Kringlunni, Heiðrún, Eiðistorgi, Smáralind, Hafnarfirði, Akureyri, Austurstræti, Holtagörðum, Dalvegi, Garðabæ, Mosfellsbæ, Sauðurkróki.
Castello di Querceto Chianti Classico Riserva (5 vínbúðir): Kringlunni, Heiðrún, Eiðistorgi, Smáralind, Akureyri.
The Laughing Magpie (13 vínbúðir): Kringlunni, Heiðrún, Eiðistorgi, Smáralind, Hafnarfirði, Akureyri, Austurstræti, Garðabæ, Mosfellsbæ, Sauðurkróki, Keflavík, Ísafirði, Hvolsvelli.
Vitiano Bianco (5 vínbúðir): Kringlunni, Heiðrún, Eiðistorgi, Smáralind, Akureyri.
Master of Wine gráðan breska hefur í hálfa öld verið sú eftirsóttasta fyrir fólk sem starfar í vínbransanum, bæði verslunarmenn og blaðamenn/rithöfunda. Þeirra meistaraprófsgráða. Þar til fyrir um 20 árum síðan var hún eingöngu fyrir Breta en nú er hún opin öllum. Aðeins u.þ.b. 250 manns frá 20 löndum hafa gráðuna í dag. MW er að mestu leyti sjálfsnám þar sem viðkomandi þarf að hafa mikla smökkunarreynslu og þekkja inn á öll ólík svið vínheimsins, allt frá markaðsmálum til víngerðar. Prófin eru ströng og lítið hlutfall hlýtur gráðuna sjálfa á endanum. Margir helstu vínfrömuðir Breta, svo sem Hugh Johnson og Jancis Robinson, hafa MW gráðu. Höfuðstöðvarnar eru í London.
San Fransisco Cronicle fjallaði nýlega um MW gráðuna í áhugaverðri grein.
Þeir í súpernova notuðu mikið orðið “awesome”. Robert Parker notar “amazing”
Hann fær aldrei nóg af Vitiano rauðvíninu, frekar en við hin. Honum finnst það “amazing”.
Okkur finnst það massakjör.
NB. Nýjum árgangi, 2005, gefur Parker líka 89 stig.
Hann er væntanlegur.
The 2004 VITIANO ROSSO (89 points) is an equal part blend of Sangiovese, Cabernet Sauvignon, and Merlot, aged three months in small oak barrels. This serious effort possesses a deep ruby/purple-tinged color as well as lovely aromas of black currants, licorice, dried herbs, and earth. An amazing value, it boasts remarkable texture, medium body, and pure, ripe berry flavors. Drink it over the next 1-2 years.- Robert Parker The Wine Advocate, ágúst 2005
Ég var að fletta í Atlasi barnanna, bók sem Gréta dóttir mín á, þegar ég sá að á landakorti af Frakklandi voru m.a. tvær myndir af vínflöskum, önnur yfir Champagne héraði og hin yfir Bordeaux. Þegar ég gáði betur sá ég að þetta voru ekki bara einhverjar gerviflöskur heldur voru þetta þekkt vín frá þekktum framleiðendum með réttum miða.
Mér var hugsað til landakortsins af Ítalíu og get ekki leynt því að ég var svona með hugann við það að hugsanlega fyndi ég þar vín frá okkur hangandi yfir t.d. Toskana héraðinu. Ólíklegt samt þar sem hundruðir þúsunda af víntegundum finnast þar í landi.
Viti menn, leyndist ekki mynd af Casal di Serra, hvítvíninu okkar frá Umani Ronchi og okkar vinsælasta víni frá upphafi.
Þetta fannst mér fyndið. Ha ha ha. Miðinn á víninu var reyndar gamall, síðan áður en við byrjuðum að flytja inn vínið svo ekki var þetta nú vín úr hillum vínbúðanna sem myndin var tekin af enda útgáfan bresk (í ísl. þýðingu).
Menn eru að koma myndum í dagblöð og tímarit eftir krókaleiðum en barnabækur…!
La Spinetta í Piemonte gerir tvö vín úr Barbera þrúgunni. Barbera d’Alba Superiore Bionzo kemur frá samnefndri vínekru (þ.e. Bionzo”) og fékk ég fyrir nokkrum dögum sendar þessar skemmtilegu myndir þar sem starfsmenn víngerðarinnar voru að týna þar þrúgur. 2006 árgangur í mótun.
Við eigum eitthvað til af 2003 árgangi þessa víns sem fæst ekki í Vínbúðunum heldur einungis með því að sérpanta hjá okkur.
Ég gæti helgað bloggið alfarið d’Arenberg víngerðinni, svo mikið er að gerast hjá þeim. Viðurkenningar streyma inn um lúguna.
Nú síðast fékk hvítvínið þeirra The Money Spider 2005 úr þrúgunni Roussanne gullverðlaun í flokkinum ”Einnarþrúgu hvítvín undir 10 pundum” hjá Decanter.
Það er mjög gott því aðeins eitt vín fær gull í hverjum flokki.
Við höfum smakkað þetta hvítvín og finnst það skemmtilegt. Hóflegur en lúmskur ilmur með hunangs og peruvotti, þykkt í munni og eftirbragðið langt. Aldrei að vita nema það eigi eftir að gera strandhögg hér landi.
Þorri Hringsson lét nýlega af störfum hjá Gestgjafanum. Í síðustu vínumfjöllun sinni fyrir blaðið, a.m.k. að sinni, fjallar hann m.a. um rauðvínið okkar The Footbolt 2003 frá d’Arenberg (ath. prentvilla í Gestgjafanum segir að vínið sé 2002, rétt er 2003).
D’ARENBERG THE FOOTBOLT SHIRAZ 2003 (Ástralía) – 4 glös
Vínin frá d’Arenberg í McLaren-dalnum í Ástralíu eru, að mínu mati, með þeim betri frá þessum slóðum sem hægt er að kaupa í búðum hér á landi og sérstaklega hef ég mætur á The Laughing Magpie. The Footbolt er hreint shiraz-vín og hefur djúpan fjólurauðan lit og opinn, sætan og sóríkan ilm sem á eftir að heilla marga. Þar blandast saman aðalbláberjasulta, minta, vanilla, þurrkaðir ávextir, Ritter Sport-rommrúsínusúkkulaði og örlitlir púrtvínstónar. Það er bragðmikið með mikla fyllingu, enda áfengismagnið mikið, og þar af leiðandi flauelsmjúkt og áferðarfallegt. Það er langt og þurrt sé miðað við þroskann í ávextinum og blessunarlega sýruríkt. Þarna eru svipaðar bragðglefsur og í nefinu og mikið af þeim öllum. Gott vín með flestu rauðu kjöti og bestu grillsteikum og þolir ágætlega bragðmikið meðlæti.
Í reynslusölu vínbúðanna 1700 kr. Mjög góð kaup.
Hiti: 16-18°C. Geymsla: Drekkið núna og til 2010.
Robert Parker var að taka til hjá sér. Daniel Thomases sem ráðinn var fyrir ekki svo löngu til að fjalla um ítölsk vín fyrir Wine Advocate útgáfu Parkers er hættur og sömuleiðis Pierre Rovani, hinn umdeildi Búrgúndísérfræðingur sem hefur verið fylginautur Parkers til fjölda ára og var lengi eini aðstoðarmaður hans.
“The times they are changing” segir Parker í ávarpi á vefsíðu sinni www.erobertparker.com. Parker sjálfur hefur minnkað jafnframt við sig og ætlar eingöngu að smakka Bordeaux, Kaliforníu og Rhone ásamt Provence.
En hvernig ætlar hann þá að fjalla um öll vínin?
Til sögunnar koma Antonio Galloni sem Parker hefur ráðið til að fjalla um ítölsk vín. Galloni er menntaður tónlistarmaður með viðskiptagráðu úr MIT og hefur á skömmum tímam skotið sér á stjörnuhiminn vínsmakkara með ítarlegri Piemonte skýrslu sinni. David Schildknecht hefur verið sóttur úr heildsölustarfi sínu til að fjalla um fjölmörg lönd allt frá Nýja Sjálandi til Mið-Vesturríkja Bandaríkjanna, þ.á.m. hið ofurviðkvæma Búrgúndíhérað, og Dr. J. Miller hefur verið ráðinn úr starfi sínu sem stjórnandi vínbúðar í Baltimore til að fjalla um Spán, Ástralíu og S-Ameríku. Mark Squires sem hefur eigin vefsíðu auk þess að halda utan um umræðunetið á vefsíðu Parkers mun fjalla um Portúgal.
Þeir, ásamt Parker, eru hið nýja “Team America” — eins og Parker orðar það sjálfur.
Hvernig þetta kemur til með að hafa áhrif á einkunnagjöfina verður spennandi að sjá.
d’Arenberg gefur reglulega út fréttabréf þar sem helstu viðurkenningar eru tíundaðar. Það hefur verið enginn skortur á efni undanfarið eins og nýjasta fréttabréfið ber glögglega vitni.
Helst ber að nefna frábæra umfjöllun ástralska vínspekúlantsins James Halliday sem gefur víngerðinni 5 stjörnur af 5 mögulegum og heiðursnafnbótina “Outstanding winery capable of producing wines of the highest caliber”. Hann gefur líka The Laughing Magpie 2004 95 stig.
Svo er þarna líka að finna sláandi einkunnir fyrir The Dead Arm 2004 og skínandi meðmæli með ódýra Stump Jump rauðvíninu sem við ætlum að flytja inn með næstu d’Arenberg sendingu.
Og svo mætti lengi telja.
d’Arenberg gefur reglulega út fréttabréf þar sem helstu viðurkenningar eru tíundaðar. Það hefur verið enginn skortur á efni undanfarið eins og nýjasta fréttabréfið ber glögglega vitni.
Helst ber að nefna frábæra umfjöllun ástralska vínspekúlantsins James Halliday sem gefur víngerðinni 5 stjörnur af 5 mögulegum og heiðursnafnbótina “Outstanding winery capable of producing wines of the highest caliber”. Hann gefur líka The Laughing Magpie 2004 95 stig.
Svo er þarna líka að finna sláandi einkunnir fyrir The Dead Arm 2004 og skínandi meðmæli með ódýra Stump Jump rauðvíninu sem við ætlum að flytja inn með næstu d’Arenberg sendingu.
Og svo mætti lengi telja.
Sagan er löng.
Líklegast eru um tvö ár síðan við tókum þá ákvörðun að merkja öll vínin okkar með litlum límmiða. Mikið hefur verið hugsað síðan. All nokkur mótíf voru sett fram, mörg þeirra glæsileg en samt einhvern ekki alveg á þeim nótum sem við vorum að reyna að spila.
Svo tókst það.
Við erum ánægð með niðurstöðuna.
Ef við höfum rétt fyrir okkur verður litli miðinn sá gæðastimpill sem við teljum að vínin okkar eigi skilið. Hann er líka hógvær á sinn hátt, truflar útlit flöskunnar ekki of mikið og hefur ákveðna tegund af lími svo megi fjarlægja hann tiltölulega auðveldlega.
Svo verður líka auðveldara að finna vínin okkar í hillum vínbúðana.
Miðinn er í 12 mismunandi útgáfum. 19. aldar dýra- og plöntumyndir skreyta hvern þeirra fyrir utan “Vín og matur” og “www.vinogmatur.is“. Svo er hönnunin mismunandi líka upp að vissu marki. Við köllum það lifandi lógó. Myndefni miðanna hefur ekkert endilega tengingu við vínin sem þeir prýða, svínið getur farið á hvaða vínflösku sem er enda miðarnir settir af algjöru handahófi.
Nýlegt spjall