Frú Lauga ætlar að bjóða upp á Amedei súkkulaði fyrir jólin.

Líklegast eru um 2 ár síðan við fluttum síðast inn Amedei en vegna gengismála slepptum við því alveg fyrir síðustu jól.

Við ætlum að láta nægja þessi jól að selja Amedei í Frú Laugu svo við getum haldið verðinu niðri og temprað aðeins áhrif gengishrunsins.

Pöntun er lögð af stað og vonandi berst súkkulaði í hús um miðjan næsta mánuð. Þarna verða góðkunningjar, sumir í nýjum umbúðum, í bland við nokkrar skemmtilegar nýjungar. Konfekt látum við alveg eiga sig þótt það sé hrikalega gott og girnilegt – okkur finnst einfaldlega verðið of hátt eins og sakir standa og setjum kraftinn í hreina súkkulaðið í staðinn. Þó verða þarna einhverjar girnilegar fyllingar, súkkulaðikrem, hvítt súkkulaði með pistasíum … …

Frú Lauga elskar súkkulaði.

Hinn framtakssami Dalvíkingur Júlíus Júlíusson er búinn að stofna matarsíðu áhugamannsins, eins og hann kallar hana.

Mjög forvitnileg síða með uppskriftum og fróðleik um mat, skrifað á persónulegan hátt. Byrjunin lofar góðu.

Þar má t.d. finna þessa uppskrift að Steinbít á Ritzpúða. Uppskriftin mun jafnframt birtast í bók sem kemur út fyrir jólin og nefnist “Meistarinn og áhugamaðurinn”.

Júlíus hvetur þá sem sýsla með matvöru að senda sér hráefni sem hann ætlar að elda upp úr og fjalla siðan um reynsluna á vefnum og hefur matarteymi sér til aðstoðar en bætir við: “Allt er þetta til gamans gert og af einskærum áhuga fyrir mat, drykk og eldhúsinu almennt. Skrifin verða með jákvæðum en gagnrýnum formerkjum.”

Aldrei að vita nema við gaukum að honum Amedei súkkulaði fyrir jólin og sjá hvað fæðist úr því.

En talandi um Amedei súkkulaði og uppskriftir, hér er uppskrift að Cantucci smákökum sem við birtum fyrir jólin 2006.

Amedei súkkulaði er í sviðsljóðinu þessa dagana, bæði Gestgjafinn og Decanter fjalla um Amedei súkkulaði í nýjustu tölublöðunum.

Gestgjafinn er tileinkaður súkkulaði að þessu sinn. Þegar ég frétti að það stæði til lagði ég til við blaðið að haldið yrði smakk á dökku súkkulaði sem var tekið vel í. Amedei fær góða umsögn í blindsmakkinu (bls. 41, 4. tbl.) en ég skal viðurkenna að ég hefði viljið sjá það toppa þetta smakk.

Decanter fjallar aðallega um vín en í nýjast tölublaðinu (apríl) er tvær síður lagðar undir súkkulaði og er fókuserað sérstaklega á Amedei sem “model producer”. Þar kemur fram að síðan fyrirmyndarfyrirtæki eins og Amedei fór að framleiða súkkulaði í nánariasamstarfi við bændurna og greiða þeim hærra verð hefur gæðum fleygt fram. Greinarhöfundurinn, Fiona Beckett, endar greinina á að lýsa Chuao súkkulaði frá Amedei með “deep chocolatey aroma and flavour and an amazingly long finish.” Í greininn er kakóekrum Amedei í Venezuela, Chuao og Porcelana, líkt við það besta sem gerist í heimi vínframleiðslu, eins og ofurvínið Petrus.

Helst ber að minnast á Chocolate Awards 2008 sem voru haldin í þriðja sinn í ár. Þar sigraði súkkulaði frá Amedei eina ferðina enn sem besta dökka súkkulaðið. Að þessu sinn kom það í hlut 63% súkkulaðisins frá Amedei að hljóta Gullnu baunina en jafnframt hlutu gullverðlaun Porcelana og Chuao auka þess sem silfur hlutu 66%, 70% og “9″ sem er með 75% kakó. Mjólkursúkkulaðið frá Amedei hlat silfur í sínum flokki.

Það er gott úrval af Amedei súkkulaði í Ostabúðinni á Skólavörðustíg og hjá Sandholt á Laugaveginu.

.

Við Ingó mágur (og stórbakari) hittumst einn sunnudag ekki fyrir löngu og bjuggum til konfekt úr Amedei súkkulaði fyrir jólablað Fréttablaðsins. Tilgangurinn var að koma súkkulaðinu til skila á sem einfaldastan og bestan hátt í konfektmola og nota til þess hrein hráefni eins og grappa, sætvín og kaffi og lítið annað. Þessir molar eru snilld, þótt ég segi sjálfur frá, enda Ingó sem á mestan heiður af þeim.

Þetta er líka auðveldara en það virkar kannski út frá lestri greinarinnar en nauðsynlegt samt að vanda sig. 

Hér fyrir neðan er greinin nokkurn veginn eins og hún birtist í Fréttablaðinu en smelltu líka á flickr til að skoða myndir sem ég tók af konfektgerðinni og vídeó á youtube sem sýnir Ingó bakara tempra súkkulaðið sem við notuðum í molana á marmaraplötu:

Amedei – konfekt 4 tegundir (samtals um 100 konfektmolar)

Konfekthjúpur (skel)
1.5 kg 70% Amedei súkkulaði.

Súkkulaðið brætt rólega þar til hitastig þess nær 45/50°C. Þá er súkkulaðinu hellt á kalt marmaraborð (eða annan stein) og því velt um með spöðum þar til hitastigið fellur niður í u.þ.b. 27°C. Þessi aðferð er kölluð “temprun” og við það kristallast súkkulaðið og tekur á sig fallegan gljáa sem gerir það glansandi auk þess sem auðveldara verður að losa molana úr formunum og handfjatla þá. Þegar temprunarhitastiginu er náð er því hellt í formin sem nota skal.
Það er líka mikilvægt að formin séu “póleruð” með því að fara vandlega ofan í hvert mót með hreinni tusku. Súkkulaðinu er þá hellt í formin og þau slegin varlega í borðið til að ná loftbólum upp á yfirborðið, þá er umframsúkkulaði hellt úr formunum aftur í skálina. Mikilvægt er að fylla í öll form sem nota skal á meðan að súkkulaðið er við þetta kjörhitastig.
Þegar búið er að setja fyllingarnar í alla molana er hugsanlegt að það þurfi að tempra súkkulaðið upp á nýtt áður en því er hellt yfir formin til að loka molunum (setja á þá botninn). Formin er þá hrist aftur til að ná loftbólum og loks smurt vel yfir með spaða til að fjarlægja umframsúkkulaði og ná fram sléttum botnum.
Það er hægt að tempra súkkulaði án þess að hella því á marmara og er það gert með því að bæta út í brætt súkkulaðið afar fínt söxuðu súkkulaði (200g á móti hverju kiló af bræddu súkkulaði) og ná þannig fram snöggkælingu – en sú aðferð er ekki eins örugg.

Fyllingar

Caffé Ganache
200 ml. rjómi
20 g. nýmalað gæðakaffi
180 g 75% súkkulaði smátt saxað (notuðum 75% Amedei “9”)

Búinn til kaffirjómi með því að hita saman í potti rjóma og kaffi vandlega án þess að sjóða og síðan látið standa. Síað í gegnum grisju á meðan það er enn heitt. Þessum kaffirjóma (samtals um 75g) síðan hellt yfir smátt saxað súkkulaðið og hrært vandlega þar til áferðin er orðin slétt og fíngerð (emúlíserað). Fyllingunni síðan sprautað í súkkulaðihjúpuð konfektmótin og þeim lokað. Þegar konfektmolinn er laus úr forminu er upplagt að skreyta hann með kaffibaun.

Vin Santo
300 g persipan (hægt að nota marsipan)
  60 g sykur
  60 g flórsykur
100 g Vin santo sætvín

Hrært saman í sprautuhæfan massa og síðan sprautað í hjúpuð konfektmótin og lokað fyrir.

Pistaccio
150 g ósaltað smjör
  60 g flórsykur
300 g Amedei mjólkursúkkulaði brætt
100 ml. Vin santo sætvín
  60 g ósaltaðar/malaðar pistasíuhnetur

Öllu hrært saman vandlega saman (emúlíserað). Sprautað í hjúpuð konfektmótin og lokað fyrir.

Grappa
270 g 70% Amedei súkkulaði (notuðum einnarekru Amedei Chuao)
140 g ósaltað smjör
  45 g flórsykur
  35 g Grappa (eða ef til vill aðeins meira…)

Súkkulaðið brætt í u.þ.b. 45°C, smjörið sett í bitum út í súkkulaðið ásamt flórsykrinum, hrært í þar til smjörið bráðnar. Grappanu bætt út í og hrært þar til allt er slétt og fínt. Sprautað í hjúpuð konfektmótin og lokað fyrir.

Eitthvað gott til að sötra á með (vín)

Líklegast er gott freyðivín það besta sem hægt er að njóta með súkkulaði og konfekti. Francois 1er (1.990 kr) frá Castello di Querceto er gott freyðivín sem liggur einhvers staðar stíl, gæðum og verði á milli einfalds prosecco freyðivíns og kampavíns. Frizzando (1.790 kr) freyðivínið frá Sandhofer í Austurríki er glettilega gott með súkkulaði Frá Querceto koma einni vínin sem við notuðum í sjálft konfektið, grappa (4.110 kr) og Vin santo (2.100 kr) og eru þau afbragðsgóð til að njóta með sömuleiðis ef fólk er yfir höfuð hrifið af hinu sterka grappa eða sætvínum. Hjónin sem eiga Querceto nota einmitt sjálf grappað sitt til að setja í fyllingar þegar þau laga konfekt heima hjá sér. Rauðvín með súkkulaði eða góðu konfekti (ekki of sætu) getur verið afbragðsgóð blanda ekki síst í lok máltíðar þegar gott rauðvín er klárað yfir góðu súkkulaði. Þó er ekki hægt að segja að súkkulaðið dragi fram bestu eiginleika rauðvína heldur er það upplifunin sem telur. Þá myndi ég mæla með rauðvíni af betri gerðinni og sem er ekki of sýrumikið eða fínlegt heldur opið og ávaxtaríkt. Góð rauðvín með súkkulaði væru t.d. rauðvínin frá hinum ástralska d’Arenberg, Juveniles (2.390 kr) frá Torbreck sem er sömuleiðis ástralskt eða feitari rauðvín frá Ítalíu eins og Nebbiolo (2.690 kr) frá La Spinetta, Cumaró Riserva (2.590 kr) frá Umani Ronchi eða Santagostino (1.890 kr) frá Firriato. Þessi vín fást í Vínbúðunum Heiðrúnu og Kringlunni.

(Amedei súkkulaði í 1kg plötum fæst í Sandholt bakaríi og í Ostabúðinni Skólavörðustíg)

“There is no doubt that chocolate beats kissing hands down when it comes to providing a long-lasting body and brain buzz” segir Dr. Lewis á vef BBC í dag.

Lestu alla fréttina þeirra

Það er vitnað í fréttina á mbl.is í dag.

Þau hafa væntanlega notað Amedei súkkulaði.

.

Kúbanskir vindlar, tómatstilkar, gufubað, pappír, þurrkaðir ávextir, sýra?

Blautir járnbrautarteinar?

Já, við erum að tala um súkkulaði. 6 ólík Amedei súkkulaði sem öll koma frá sitthvoru landinu og undir yfirskriftinni “I Cru”.

Ég gleymi því ekki þegar við Rakel smökkuðum “I Cru” fyrst, þá áttuðum við okkur á því að það að smakka og upplifa súkkulaði gat kallað fram svipaða upplifun, vangaveltur og lýsingar eins og að smakka vín. Meira að segja nafnið “I Cru” minnir á vín, sbr. premier cru og grand cru á Frakklandi. Við þefuðum af þeim, bitum í, smjöttuðum, fundum bragðið og eftirbragðið, töluðum um sýru og tannín, ferska og þurrkaða ávexti og ýmsa aðra eiginleika og heilluðumst að því hveru ólík 6 mismunandi tegundir af 70% súkkulaði frá sama framleiðanda gátu verið.

Við átum okkur í gegnum alla línuna í gærkveldi og þá fattaði ég að það var því kominn tími á að ég gerði netta smakkskýrslu um tegundirnar 6 sem ganga undir Nafninu “I Cru”.

Venezuela – Mjög gott jafnvægi í þessu súkkulaði, þ.e.a.s. enginn einn þáttur sem stendur út úr og gerir það óvenjulegt heldur er þetta frekar svona sitt lítið af hverju.

Granada – Fremur mildur ávöxtur undirstrikaður af ferskum sítrus. Áberandi rjómamjúkt.

Madagascar – Okkur hefur fundist þetta ávaxtaríkast af tegundunum sex, þurrkaðir ávextir í bland við ferska. Tvímælalaust eitt mest spennandi súkkulaðið í hópnum að okkar mati. Flókið.

Jamaica – Ásamt Trinidad er þetta sérstakasta súkkulaðið. Dimmt og lágtónað með blæ sem minnir á gufubað eða blautan við. Hrátt og svolítið villt.

Trinidad – Tóbak! Þegar maður finnur tóbaksilminn gleymir maður öllu öðru. Þetta eru kúbuvindlar í súkkulaðilíki.

Ecuador – Það súkkulaði sem hefur sterkastan kakókarakter, bæði hvað ilm og bragð varðar. Bragðmikið og stórt.

I Cru fást í gjafaösku hjá Kokku á Laugaveginum (12 stykki í pakka, tvö frá hverju landi) og í stykkjavís á kaffihúsum Kaffitárs.

Allt AMEDEI súkkulaði hefur lækkað eftir að virðisaukaskatturinn á súkkulaðið fór úr 24.5% í 7%.

AMEDEI Smakkpakkarnir sem við kynntum fyrir jólin í fyrra eru ekki fáanlegir sem stendur fyrir utan einn:

“Smakkpakki #6 – 2.800 kr.
Samanstendur (ath. ekki gjafapakkning) af 6 mismunandi súkkulaðiplötum. Tegundirnar eru eftirfarandi: Chuao (50g), Toscano 70% (100g), Toscano 66%(100g), Mjólkursúkkulaði (100g), Hvítt súkkulaði með pistasíuhnetum (100g) og 63% súkkulaði með ferskjum og apríkósum (50g).”

Áður 2.800 kr. – nú 2.400 kr. (heimsending innifalin)

Þeim sem hafa áhuga geta sent mér póst á vinogmatur@internet.is og lagt inn pöntun. Ef ég bæti gjafaöskju af Selezioni TOSCANO BLACK (12 5g. smástykki af 63%,66% og 70% súkkulaði) og gjafaöskju af Selezioni I CRU (12 5g. smástykki 70% frá 6 ólíkum löndum) þá kostar pakkinn 3.700 kr.

.

Laugardaginn 10. mars kl. 14.00 ætlum við að hafa vínsmökkun á veitingastaðinum La Primavera.

Þemað eru 7 sem hafa breytt Ítalíu að mati Gambero Rosso.

Hérna er vínlistinn:

Appiano Sauvignon Blanc St. Valentin 2005
Montevetrano 2001
Falesco Montiano 2001
Foradori Granato 2001
Fontodi Flaccianello 2003
Arnaldo Caprai 25 Anni 2003
Luciano Sandrone Barolo Cannubi Boschis 2001

Létt snarl verður borið fram með vínunum. Auk þess verður smakkað sætvín frá Arnaldo Caprai með AMEDEI súkkulaðirétti sem Leifur ætlar að útbúa.

Verðið er 4.500 kr. fyrir hvert pláss.  Sendu okkar tölvupóst á vinogmatur@internet.is til að láta taka frá sæti.

Skoðaðu myndirnar frá vínsmökkuninni á La Primavera í fyrra

Hún Sigrún Vala, eigandi Englatárs, sendi okkur þessa góðu kveðju eftir námskeiðið á Miðvikudaginn (birt með hennar leyfi) og kunnum við henni bestu þakkir fyrir sömuleiðis:

Því er skemmst frá að segja, að við áttum “nautnafulla kvöldstund” [á súkkulaðinámskeiðinu] með fjölda annarra gesta. … átum súkkulaðið góða og smökkuðum það með sérstæðum víunum, ásamt því að fá tillögur af góðum uppskriftum með og úr… öllu saman. Þau Arnar, Dominique og Ásgeir frá… Vín og matur , Vínskólanum og Sandholt Bakarí eru ómissandi fyrir okkur “óþekku” “gourmet”-”fíklana”. Það sem gersamlega heillaði mig er ástríða þessa fólks [...] Ég er hjartanlega ánægð að hafa uppgötvað ykkur.

Kærar þakkir. — Sigrún Vala Valgeirsdóttir, Framkvæmdastjóri og eigandi Englatárs ehf.

Í gærkvöldi var Amedei súkkulaðinámskeið í Vínskólanum. Mér til aðstoðar voru Dominique sem rekur skólann og Ásgeir Sandholt, einn af okkar færustu bökurum.

Það tókst afar vel, svo vel reyndar að ég gleymdi alveg að taka myndir fyrir utan þessa einu mynd. Ég var meira að segja ekki hálfnaður að stilla upp á borðið þegar hún var tekin.

Og ef einhver er að velta því fyrir sér — jú það voru í alvörunni þátttakendur í námskeiðinu þótt þeir sjáist ekki á myndinni. 16 manns reyndar.

Ég sem ætlaði að setja fullt af flottum myndum á flickr og senda Amedei tengiliðnum mínum til að sýna hvað ég væri að gera í þeirra málum hér á landi.

Eiginlega er þessi gleymska mín mælikvarði hversu námskeiðið gekk vel, ég var með hugann við allt annað en myndatöku a.m.k. Þetta hefur gerst áður, t.d. á Prowein vínsýningunni þar sem myndavélin hringlaðist í vasanum í tvo daga án þess að ég myndi einu sinni eftir að taka hana upp og smella af framleiðendunum sem við vorum að tala við og smakka vín hjá.

Kemur vonandi næst. Á Vinitaly vínsýningunni sem við Rakel förum á eftir mánuð þarf ég a.m.k. eitthvað átak ef ég ætla að muna eftir þessu.

Óskar súkkulaðsins er veittur af Chocolate Academy í London. Nú síðast fyrir árið 2007.

Í súkkulaðiakademíunni eru allir veggir úr súkkulaði, þakið úr kakólaufum, gólfið úr kakóbaunum og heitt súkkulaði drýpur úr hverjum krana.

AMEDEI stakk keppinauta sína af sem fyrr og hlaut þrjú gull í flokki dökks súkkulaðis. Dómnefndin gat einfaldlega ekki gert upp á milli þeirra og valdi öll þrjú.

AMEDEI var líka fremst í flokki fyrir tveimur árum þegar keppnin var haldin síðast (sjá viðurkenningar 2007 og 2005).

Hmm, er kannski rétt að minnast á AMEDEI súkkulaðismakkið í Vínskólanum á Miðvikudaginn?

.

Í samstarfi við Ásgeir Sandholt bakarameistara og Dominique hjá Vínskólanum ætlum við að bjóða upp á Amedei súkkulaðismökkun. Það verður haldið á Centrum hótelinu í Aðalstræti miðvikudaginn 21. febrúar kl. 18.00.

Þarna verða á ferðinni nokkrir mismunandi styrkleikar af dökku súkkulaði, mjólkursúkkulaði, 6 tegundir af 70% súkkulaði frá ólíkum löndum og eitthvað fleira frá hinni rómuðu Amedei súkkulaðigerð í Toskana.

Þótt súkkulaðið sé náttúrulega sæla út af fyrir sig ætlum við að prófa þrjár tegundir af víni með, Vin santo frá Castello di Querceto, Passito Sagrantino di Montefalco frá Arnaldo Caprai og The Laughing Magpie frá d’Arenberg.

Námskeiðið kostar 2.200 kr. Vinsamlegast sendið póst á vinogmatur@internet.is til að láta taka frá sæti.

.

Í Fréttablaðinu í dag er pistill um ágæti súkkulaðis  (allt – heilsa ofl. bls. 4) þar sem segir að rannsóknir hafi sýnt að súkkulaði í hóflegu magni sé í raun hollt. Þar er mælt með neyslu dökks súkkulaðis þrisvar til fjórum í viku en ekki of mikið í einu.

Takk fyrir það.

Ekki er sagt hvaðan rannsóknin kemur en ég bloggaði um álíka rannsóknarniðurstöður frá John Hopins Háskóla ekki alls fyrir löngu. Að þeirra mati hreinsar dökkt súkkulaði æðarnar.

Margir virðast vera sammála Fréttablaðinu, t.d. er hér ein gömul frétt um antioxidanta og súkkulaði.

Lestu líka um hollustu súkkulaðis á Wikipedia.

 70% Amedei súkkulaði fæst t.d. á öllum kaffihúsum Kaffitárs, hjá Kokku á Laugaveginum og í Fylgifiskum Suðurlandsbraut.

Leitið skjóls!

Þetta eru súkkulaðisprengjur.

Cantucci smákökur með kakói í deiginu, súkkulaðibitum og síðan hjúpaðar með súkkulaði að hálfu.

Cantucci eru þær ítölsku smákökur sem margir kalla oft Biscotti en Biscotti þýðir í raun og veru bara “kex” á ítölsku og því réttara að nota Cantucci. Hinar ílöngu Cantucci smákökur koma í ýmsum útgáfum en sú klassíska er ljós að lit, sæt og með möndlum.

Það er búið að súkka þessa upp:

6 matskeiðar ósaltað smjör við stofuhita
2 bollar hveiti
1/2 bolli ósætt kakó
1 tsk. bökunarsódi
1/4 tsk. salt
1 bolli sykur
2 stór egg
1 bolli möndlur
1/2 bolli Amedei 70% súkkulaði skorið í smáa bita
1/2 bolli (eða meira) Amedei 70% súkkulaði brætt til að hjúpa með

(ath. bollar miðast við amerískan bolla)

Hita ofninn í 180¨C. Blanda saman hveitinu, kakóinu, bökunarsódanum og saltinu í skál. Smjör og sykur sett í aðra skál og þeytt saman þar til létt og loftkennt. Eggjunum síðan bætt út í og þeytt varlega þar til þau hafa blandast vel saman við. Sett úr báðum skálum í hrærivél og hrært þar til vel blandað saman. Möndlum og súkkulaðibitum bætt út í og hrært þar til vel blandað saman.

Deiginu skipt í tvennt og báðir hlutar settir á bökunarpappír sem hefur verið létt borið á smjör og hveiti. Báðum deighlutum er þjappað varlega niður og mótaðir þar til fremur flatir og ílangir (uþb. 7×25 cm), ekki of flatir þó. Bakað í ofni í 25 mínútur og kælt í uþb. 5 mínútur.

Skorið þversum niður með beittum hníf þannig að kökurnar verði um 2 cm á þykkt. Kökunum síðan raðað á bökunarpappír (sárið niður) og bakaðar í svona 8 mínútur.

Bræða Amedei súkkulaði og dýfa kökunum í að hálfu.

70% Amedei súkkulaði fæst í Fylgifiskum á Suðurlandsbraut.

Skv. nýrri rannsókn hjá John Hopkins Háskóla í Bandaríkjunum hjálpar dökkt súkkulaði við að hreinsa æðarnar.

Þessar nýjustu niðurstöður eru enn ein staðfestingin um heilsusamlega eiginleika súkkulaðis.

Rannsóknir um hollustu rauðvíns eru ennþá fleiri og hvítvín er talið vinna á bjúgi.

Svo ekki sé nú minnst á ólífuolíuna.

Kannski að Vín og matur ætti að fara að skilgreina sig upp á nýtt: “Heildsala með hollustuvörur”?.

Ég á bara eftir að finna eitthvað jákvætt um hunang og rauðvínsedik en það ætti ekki að vera erfitt.

Súkkulaðið okkar kemur frá Amedei á Ítalíu. Heyrst hefur að það veki líka erótískar kenndir hjá þeim er þess neyta.

Jólasending ársins kemur frá Ítalíu um mánaðarmótin. Ég kalla hana svo þar sem í henni verður Amedei-súkkulaðið sem við höfum verið að bíða eftir enda ekki stök stöng eftir á heimilinu.

TVG sér um að sækja þetta og koma því til landsins. Trukkur á þeirra vegum sækir 5 bretti af víni til Castello di Querceto í Toskana þar sem við höfum safnað saman nokkrum framleiðendum: Castello di Querceto sjálfum á tveimur brettum og nágranna hans Fontodi á öðrum tveimur brettum og síðan grappa frá öðrum nágranna Rietine og ofurvíninu Montevetrano saman á einu bretti geri ég ráð fyrir. Montevetrano er sá eini sem kemur frá öðru svæði en Toskana, alla leið frá Campania héraði syðst á Ítalíu.

Trukkurinn kemur líka við hjá Amedei súkkulaðigerðinni í nágrenni við borgina Pisa, einnig í Toskana áður en hann brælir upp eftir álfunni til Hollands þar sem sendingin fer í skip. Sendingin átti að fara í skip næsta miðvikudag og þá hefði hún komið til landsins 5 dögum síðar en því miður klikkaði það og henni seinkar um viku.

Þetta verður svona jólasending okkar í ár en við munum setja aðrar af stað í desember sem koma á næsta ári t.d. frá Ástralíu en þær eru heila tvo mánuði að berast á landsteinana.

Við göngum frá Amedei súkkulaðipöntun í næstu viku. Hægt er að panta einhvern þessari smakkpakka með því að senda okkur tölvupóst á vinogmatur@internet.is og við sendum til þín við komuna til landsins eftir u.þ.b. mánuð.

Smakkpakki #1 – 750 kr.
Toscano Black Selezioni
55gr. pakki með 12 smástykkjum af þremur ólíkum gerðum af dökku súkkulaði, 70%, 66% og 63%, og eru 4 smástykki af hverri sort.

Smakkpakki #2 – 900 kr.
I Cru Selezioni
55gr. pakki með 12 smástykkjum af eingöngu 70% súkkulaði frá 6 ólíkum löndum, tvö stykki frá hverju landi, Trínídad, Venezuela, Madagaskar, Ekvador, Granada og Jamaica.

Smakkpakki #3 – 4.900 kr.
Le Selezioni
Falleg askja með 5 ólíkum 55gr Selezioni pökkum sem hver inniheldur 12 smástykki. Toscana Black og I Cru eins og eru hér fyrir ofan en jafnframt sitt hver pakkinn af besta súkkulaði (í heimi?) Amedei, Porcellana (70%), Chuao (70%) og “9″ (75%).

Smakkpakki #4 – 2.500 kr.
Le Praline
290gr. konfektkassi með 25 molum þar sem einfaldleiki, jafnvægi og bestu fáanlegu hréfni spanna stórkostlega bragðflóru frá capuccino til mandarína. Maður lítur konfekt aldrei sömu augum eftir þennan kassa.

Smakkpakki #5 – 7.900 kr.
Collezione
Falleg askja sem inniheldur 80gr. konfektkassa með 12 molum, 120gr. trufflukassa með 12 molum, 55gr Selezione Chuao með 12 smástykkjum, 55gr Selezione Toscano Black með 12 smástykkjum og 100gr. súkkulaðiplötur af eftirfarandi tegundum (alls 8oogr.): Toscano 70%, Toscano 63%, Mjólkursúkkulaði, Mjólkursúkkulaði með heslihnetum, Dökkt súkkulaði með möndlum, Hvítt súkkulaði með pistasíuhnetum, 70% súkkulaði með rauðum berjum og 63% súkkulaði með ferskjum og apríkósum.

Smakkpakki #6 – 2.800 kr.
Samanstendur (ath. ekki gjafapakkning) af 6 mismunandi súkkulaðiplötum. Tegundirnar eru eftirfarandi: Chuao (50g), Toscano 70% (100g), Toscano 66%(100g), Mjólkursúkkulaði (100g), Hvítt súkkulaði með pistasíuhnetum (100g) og 63% súkkulaði með ferskjum og apríkósum (50g).

Amedei súkkulaðið snýr aftur. Það var reyndar aldrei hætt, en lagerinn kláraðist í vor og síðan höfum við Rakel þurft að narta í annars flokks súkkulaði (frekar, þriðja eða fjórða flokks).

Amedei er fyrsta flokks súkkulaði.

Bragðlaukurinn Ferran Adrià á El Bulli (Besti veitingastaður í heimi skv. Restaurant Magazine) segir Chuao súkkulaðið frá Amedei hugsanlega vera það besta í heimi eins og fram kemur í þessari grein í Food and Wine Magazine.

Við ætlum að efla nærveru Amedei súkkulaðis á Íslandi eftir að næsta sending kemur til landsins. Það er svo gott að annað er bara ekki hægt.

Piemonte – Luciano Sandrone

Rúnturinn til Sandrone frá Amedei var lengri en ég gerði ráð fyrir og mættum við ekki fyrr en rétt undir 17.00 þrátt fyrir að hafa mælt okkur mót kl. 15.00. Það gerði þó ekkert til, Luciano og Barbara dóttir hans voru pollróleg yfir þessu.

Luciano Sandrone er stórgerður maður sem gerir fínleg vín. Barolo vínum er stundum líkt við Búrgúndí en mörg þeirra vína sem ég hef smakkað af nýja skólanum frá svæðinu eru þó mun kröftugri og karlmannlegri – væri frekar hægt að líkja þeim við Bordeaux. Barolo vínin frá Sandrone eru þó hins vegar hiklaust “Búrgúndí”… hann segir það sjálfur.

Fjölskyldan býr í sama húsi og víngerðin. Þetta er nýtt og afar glæsilegt hús sem er ekki beinlínis týpískt ítalskt heldur minnti mig einhverra hluta vegna frekar á Kaliforníuvínhús, nútímalegt en umfram allt fúnksjónalt… kannski áhrif frá S-Ítalíu eða Spáni.

Allavegana… þarna sameinast virðing fyrir hefðunum og nútímaleg hugsun sem hvergi annars staðar. Allt ferlið fer eftir þyngdarlögmálinu þ.e. þrúgunum er keyrt efst í húsið þar sem þær renna ofaní í gerjunartanka og þaðan á hæðina fyrir neðan í tunnurnar. Nýjasti hluti hússins var enn í byggingu og sáum við hvernig hvert herbergi er byggt innan í öðru stærra herbergi svo að bilið þar á milli veiti 100% jafna kælingu, eins konar hús í húsi. Frönsku barrique eikartunnurnar sem Sandrone notar eru svokallaðar No Toast þ.e.a.s. þær hafa ekkert verið ristaðar svo að vínin verði aldrei kaffærð í eik. Hann var eini framleiðandinn sem við hittum á þessu ferðalagi sem notar slíkar tunnur eingöngu… allir aðrir voru með Low Toast eða Medium Toast.

Síðan smökkuðum við með Luciano gegnum línuna og kvöddum með leiðbeiningar um góðan veitingastað, Le Torri í kastalaþorpinu Castiglione Falletto:

Antipasto:
(Arnar) La carne cruda e la salsiccia di Bra
(Rakel) Le verdure di mezza primavera ripiene e salsa al basilica

Primo Piatto:
(Arnar) I gnocchi di patate al castelmagno d’Alpeggio
(Rakel) I tajarin al ragú di salsiccia di Bra

Vín:
hvítvínið Langhe Bianco 2001 frá Scavino sem var einstaklega gott og ferskt með góða mýkt og fyllingu, bragðmikið með keim af smjöri, ananas, salvíu og kiwi m.a.

Maturinn var góður en ég verð að segja að hráa kjötið (cruda) sem ég fékk í forrétt var ekkert í líkingu við þunnt og elegant nautacarpaccióið á La Primavera heldur stærðar kjöthrúga sem leit út eins og búið væri að hvolfa úr nautahakkskjötpakka á disk og … thats it ! Ég var eins og tryllt ljón að reyna að koma öllum þessu hráa kjöti oní mig. Þegar við báðum um reikninginn var okkur tjáð til óvæntrar ánægju að Luciano Sandrone hefði boðið okkur þessa máltíð…. af hverju hafði ég ekki pantað Barolo ?! urrr….

Hótelið var síðan lítið en stórglæsilegt fjölskylduhótel Casa Pavesi (Heimili Pavesi fjölskyldunnar) í kastalaþorpinu Grinzane Cavour en því miður gátum við lítið notið þægindanna og verandarinnar með útsýninu yfir Barolosveitirnar því við þurftum að vera í Alto Adige kl. 10.00 morguninn eftir… 5 klukkutíma í norðaustur.