Monthly Archives: október 2006

Þurrkar í Ástralíu

Um fjórðungur vínuppskeru Ástrala er í hættu, jafnvel meira, vegna þurrka og frosts skv. þessari grein í Decanter.

Ég þarf að spyrja d’Arenberg hvernig ástandið er hjá þeim í McLaren Vale dalnum.

Reyndar hefur helsta ógn ástralskrar vínframleiðslu undanfarið ekki verið rýrnun uppskeru heldur einmitt öfugt — offramleiðsla… 900 milljón lítrar eru á umframlager eins og staðan er í dag.

Færðu inn athugasemd

Filed under ástralía, d'arenberg, decanter, fréttir, loftslag, víngerð

Vínsmökkun í MK

Þá er ég nýkominn úr vínsmakki fyrir nemendur í matvælaskóla MK. 20 manns og annað holl á morgun.

Smakkið fer fram á ensku, til að undirbúa nemendur sem koma til með að vinna við veitingageirann í því að þekkja og hugsa um vín og eiga um það hugsanleg samskipti við erlenda gesti sína.

Neil enskukennari á heiðurinn að þessu. Fyrir utan að læra enskuna finnst honum mikilvægt byggja snemma upp áhuga og metnað í stéttinni.

Ég var með svona í MK líka í fyrra og hefur gengið vel. Gaman að sjá 16-17 ára krakka velta þessu fyrir sér og smakka nokkur vín — með leyfi foreldra að sjálfsögðu.

Færðu inn athugasemd

Filed under fræðsla, kennsla, vínsmökkun

Amedei smakkpakkar

Við göngum frá Amedei súkkulaðipöntun í næstu viku. Hægt er að panta einhvern þessari smakkpakka með því að senda okkur tölvupóst á vinogmatur@internet.is og við sendum til þín við komuna til landsins eftir u.þ.b. mánuð.

Smakkpakki #1 – 750 kr.
Toscano Black Selezioni
55gr. pakki með 12 smástykkjum af þremur ólíkum gerðum af dökku súkkulaði, 70%, 66% og 63%, og eru 4 smástykki af hverri sort.

Smakkpakki #2 – 900 kr.
I Cru Selezioni
55gr. pakki með 12 smástykkjum af eingöngu 70% súkkulaði frá 6 ólíkum löndum, tvö stykki frá hverju landi, Trínídad, Venezuela, Madagaskar, Ekvador, Granada og Jamaica.

Smakkpakki #3 – 4.900 kr.
Le Selezioni
Falleg askja með 5 ólíkum 55gr Selezioni pökkum sem hver inniheldur 12 smástykki. Toscana Black og I Cru eins og eru hér fyrir ofan en jafnframt sitt hver pakkinn af besta súkkulaði (í heimi?) Amedei, Porcellana (70%), Chuao (70%) og „9“ (75%).

Smakkpakki #4 – 2.500 kr.
Le Praline
290gr. konfektkassi með 25 molum þar sem einfaldleiki, jafnvægi og bestu fáanlegu hréfni spanna stórkostlega bragðflóru frá capuccino til mandarína. Maður lítur konfekt aldrei sömu augum eftir þennan kassa.

Smakkpakki #5 – 7.900 kr.
Collezione
Falleg askja sem inniheldur 80gr. konfektkassa með 12 molum, 120gr. trufflukassa með 12 molum, 55gr Selezione Chuao með 12 smástykkjum, 55gr Selezione Toscano Black með 12 smástykkjum og 100gr. súkkulaðiplötur af eftirfarandi tegundum (alls 8oogr.): Toscano 70%, Toscano 63%, Mjólkursúkkulaði, Mjólkursúkkulaði með heslihnetum, Dökkt súkkulaði með möndlum, Hvítt súkkulaði með pistasíuhnetum, 70% súkkulaði með rauðum berjum og 63% súkkulaði með ferskjum og apríkósum.

Smakkpakki #6 – 2.800 kr.
Samanstendur (ath. ekki gjafapakkning) af 6 mismunandi súkkulaðiplötum. Tegundirnar eru eftirfarandi: Chuao (50g), Toscano 70% (100g), Toscano 66%(100g), Mjólkursúkkulaði (100g), Hvítt súkkulaði með pistasíuhnetum (100g) og 63% súkkulaði með ferskjum og apríkósum (50g).

Færðu inn athugasemd

Filed under amedei, súkkulaði, smakkpakki

Rósavín á uppleið

Rósavínsneysla í Bretlandi er 5-7% af heildarléttvínsneyslu skv. þessari grein í Beveragedaily.com.

Fyrir nokkrum árum var hún aðeins 1%.

Rósavín eru ekki bara í tísku heldur er fólk að átta sig á því hversu miklu betri rósavín eru miðað við gutlið sem það var vant að drekka þegar rósavín voru vinsæl hér í gamla daga.

Ég get ekki sagt að ég sé beinlínis að moka út rósavínum þessa dagana en það getur ekki verið tilviljun þegar tveir góðir veitingastaðir hér í borg hringja í mig að fyrra bragði og spyrjast sérstaklega fyrir um rósavín. Annar þeirra, Vox, býður gestum sínum upp á rósavínin Artazuri og Mourgues du Gres Les Capitelles.

Rósavín eru ekki bara sumarvín frekar en hvítvín. Þau eru jú gleðivín, björt, fersk og hressandi. En hver slær hendinni á móti slíkum eiginleikum í skammdeginu?

Rósavín eru sömuleiðis fjölhæf matarvín, feta stíginn milli hvítra og rauðra og geta gengið í hlutverk þeirra beggja þegar svo ber við.

Færðu inn athugasemd

Filed under artazuri, frakkland, fréttir, mourgues du gres, spánn, vín

Kraftbrauð úr súrdeigi

Ingólfur mágur minn er bakarameistari og Fagstjóri bakaradeildarinnar í Hótel- og Matvælaskólanum í MK. Hann bjó til uppskriftina af súrdeigskraftbrauðinu hér fyrir neðan. Frábært brauð, kjarnmikið, hollt en létt engu að síður og upplagt með hvers konar góðu áleggi (eins og heimalöguðu marmelaði og osti…).

Kraftbrauð úr súrdeigi
Höfundur: Ingólfur Sigurðsson

Súrdeig 1. þrep „Móðursúr”  
50 g bygg (móðir jörð)           ** Hrært saman í skál. Breiða plastfilmu yfir.
50 g rúgmjöl                           ** Standa í stofuhita í 2 sólarhringa
50 g rúgsigtimjöl
50 g speltmjöl gróft                * pressugerið þarf að standa úti í stofuhita í
200 g vatn 27°C                       1 – 2 sólarhringa fyrir notkun til að fá
3-5 g gamalt pressuger*          fram réttu  mjólkursýrubakteríurnar.

Þegar móðursúrdeigið er tilbúið þarf að halda því við með því að fara í 2. þrep og endurtaka það á 2ja daga fresti þar til deigið er orðið fullþroskað eftir 10-14 daga. Eftir það getur súrdeigið haldist lifandi við stofuhita í fleiri ár svo framarlega sem það fær áfram næringu með því að endurtaka 2. þrep ávallt á 2ja daga fresti. Ef það er ekki gert deyr súrdeigið. Það skiptir ekki máli hversu miklu magni er bætt út í móðurdeigið, aðalatriðið er að hlutfallið milli hráefnanna haldi sér (50/50 vatn og mjöl).

Súrdeig 2. þrep   Bæta út í móðursúrinn:
50 g bygg (móðir jörð) 
50 g rúgmjöl
50 g rúgsigtimjöl                    ** Hrært saman. Breiða plastfilmu yfir. Standa í
50 g speltmjöl gróft               ** stofuhita í 2 sólarhringa
200 g vatn 28°C  

o.s.frv.
—————————

Kraftbrauð (uppskriftin gefur 2 – 3 stór brauð (fer eftir formastærð)):
160 g hörfræ                      *
300 g vatn (mjög heitt)      * Lagt í bleyti í 30 mín.
+
700 g  fullþroskað (10-14 daga gamalt eða meira) súrdeig blandað,  bygg sigti, rúg og spelt.(**)
+
600 g vatn  30°C
200 g spelt gróft
200 g rúgmjöl
200 g rúgsigtimjöl
160 g graskersfræ  
160 g sólkjarnafræ 
140 g heilir hafrar
170 g haframjöl (grautargrjón)
  15 g kúmen
  30 g sjávarsalt 
  
Deigið unnið hægt í 10 mín; látið standa í 16 klst.
Vigtað í frekar stór form þannig að deigið fylli formið ¾ , Látið hefast í formunum í ca. 3 klst eða þar til deigið fyllir formin upp að brún.
   
Bakstur:  250° inn í ofn
Skvetta 1 dl vatni í botninn á ofninum og loka.
Hitastig á brauðum lækkað eftir 5 mínútur í 200° og bökuð í ca 80 mín (miðað við 1000 ml. form)

——————————

Súrdeigið sem ekki þarf að nota í þessa uppskrfit er hægt að halda á lífi með reglulegum viðbótum/næringu sbr. leiðbeiningar hér ofar. Dæmi eru um 5 ára gamalt móðursúr í bakarastéttinni sem fæddi af sér margt brauðið.

Ath. Pressugerið sem notað er í upphafi er einungis til að ná fram ræktun á heppilegustu mjólkursýrubakteríunum. Þetta hefur engin áhrif á það germagn sem er í fullþroskuðu súrdeigi. Hins vegar er mikilvægt að pressugerið sé ekki nýtt heldur gamalt. Þannig hefur magn mjólkursýru í gerinu margfaldast.

Verði ykkur að góðu
Ingólfur Sigurðsson

Færðu inn athugasemd

Filed under brauð, uppskrift

Vinitaly vínsýninginn – hér kem ég

Þá er ég búinn að ganga frá flugmiðum og hóteli í Veróna um mánaðarmótin mars/apríl.

Flugmiðarnir höfðust með smá púsli enda engin bein og greið leið niður á smáflugvöllinn í Veróna.

Hótelið var erfiðara. Vínsýningin er vel sótt þannig að öll herbergi fyllast að því er virðist með árs fyrirvara. Ég sendi út um 10 fyrirspurnir í sumar auk þess að skoða heilmargar leitarvélar þangað til ég fékk loks eitt jákvætt svar sem ég tók fegins hendi. Skilyrðið mitt var að vera í miðborginni en þaðan er sýningarsvæðið í göngufjarlægð. Reyndar fékk ég boð um gistingu hjá framleiðanda á svæðinu sem á geysilega flottan kastala en þar sem ég hef ekki áhuga á vínum þeirra í bili amk. fannst mér eitthvað ómögulegt við það að sníkja þar gistingu.

Vinitaly vínsýninginer sú stærsta á ítalíu og kæmi mér ekki á óvart að hún væri sú stærsta í heimi á eftir Bordeaux vínsýningunni. Þarna koma saman nánast allir framleiðendur Ítalíu, vínkaupmenn, veitingamenn, blaðamenn og áhugafólk. Ég er ekki síst spenntur fyrir boðum á lokaðar smakkanir, matarboðum og slíku sem gefur svona ferð ennþá meira gildi.

Ég hef ekki farið nýlega, síðast gekk það ekki einfaldlega vegna þess að ég fann hvorki hótel né flug. Árið þar á undan fórum við Rakel frekar í almennilega heimsókn til framleiðandanna okkar og ferð á vínsýninguna því að mestu óþörf.

Færðu inn athugasemd

Filed under ítalía, ferðalög, vín, vínsýning

Montevetrano í biblíunni

Fimm vínbiblíur á Ítalíu eru gefnar út á hverju ári á Ítalíu hver frá sínum útgefandanum/höfundinum. Þær voru að koma út fyrir 2007.

Hver og ein hefur sitt einkunnakerfi og í raun breytir það frekar litlu hvaða kerfi þær nota – allar draga þær fram ákveðin vín sem bestu vín Ítalíu í það skiptið.

Merkilegt nokk að þótt oft séu einhverjar biblíanna fimm sammála um að ákveðin vín séu bestu vín Ítalíu þá gerist það ótrúlega sjaldan að allar fimm biblíurnar séu sammála.

Gambero Rosso gefur t.d. hæstu einkunn sína, glösin þrjú (TRE BICCHIERI), til næstum 300 vína.

Af þeim eru aðeins tvö sem hin fjórar biblíurnar gefa líka hæstu einkunn.

Vínin tvö þetta árið sem allar fimm vínbiblíurnar eru sammála um að séu bestu vín Ítalíu eru Galatrona 2004 frá Petrolo og okkar vín Montevetrano 2004.

Reyndar fluttum við aðeins inn Montevetrano 2001 en ég sendi póst rétt áðan til  hennar Patriziu til að athuga hvort ég ætti ennþá inni flöskurnar sem ég pantaði af 2002, 2003 og nú 2004 árganginum. Vonandi gengur það svo Íslendingar geti notið þess víns sem flestir eru sammála um að sé meðal bestu vína Ítalíu.

Í fyrra voru aðeins fleiri vín sem allar fimm biblíurnar voru sammála um að væru þau bestu eða alls átta vín. Við áttum tvö þeirra, Barolo Le Vigne 2001 frá Luciano Sandrone og Granato 2003 frá Foradori.

Færðu inn athugasemd

Filed under ítalía, dómar, fréttir, montevetrano, rauðvín

Uppskerufréttir frá Chateau de Lascaux

.

Chateau de Lascaux hefur tvö meðmæli sem eru betri en hvaða einkunn sem er, eða gott sem. Kermit Lynch, bandaríski heildsalinn sem ég hef mikið dálæti á, flytur þau inn og í öðru lagi þá framleiðir Lascaux vín hússins á einum skemmtilegasta veitingastað London, St. John, fyrir utan að eiga 3-4 önnur vín á vínlistanum þeirra.

Jean-Benoit Cavalier, eigandi og víngerðarmaður Chateau de Lascaux var að senda mér þessar fréttir af 2006 uppskerunni.

2006 árgangur verður „sublime vintage“ að mati Hr. Cavalier.

Á uppskerudögum í Vínbúðunum Heiðrúnu og Kringlunni er hægt að kaupa Pic Saint Loup 2004 frá Lascaux á tilboð, 1.650 kr. í stað 1.750 kr. Þetta er flott vín, mjúkt með mikla fyllingu, barmafullt af s-frönsku kryddi og þroskuðum ávöxtum.

Færðu inn athugasemd

Filed under fræðsla, fréttir, rauðvín, tilboð

Þrjú vín hætta í ÁTVR

Ég fór upp á lager hjá ÁTVR í dag og sótti restar af þremur vínum sem voru að hætta í sölu. Þau voru Gotim Bru frá Castell del Remei, Altavilla frá Firriato og Bandol frá Domaine Tempier.

Ef ég vil get ég sett þessi vín aftur inn í Vínbúðirnar eftir eitt ár.

Altavilla og Gotim Bru hafa þegar farið tvisvar sinnum í gegnum þetta ferli í ÁTVR. Í fyrra skiptið voru þau nokkuð nálægt því að haldast inni og jafnvel ná í kjarna en það gekk ekki á endanum. Eftir ár setti ég þau aftur inn en sagan endurtók sig, bæði duttu aftur út.

Ég ætla ekki að reyna í þriðja sinn.

Vínin eru því á sérstöku rýmingarsöluverði þar til birgðir klárast.

Það á ekki við um Bandol frá Tempier enda fór vínið aldrei inn í Vínbúðirnar með það fyrir augum að ná í kjarna enda vínið of dýrt. Til hvers þá að setja vínið þá inn í ÁTVR yfir höfuð? Tja, þar kemur líklegast hugsjónin inn í, hún getur stundum verið dálítið ópraktísk blessunin.

Bandol frá Tempier er eitt af flaggskipsvínum Provence héraðsins. Það verður hægt að sérpanta það með því að senda okkur tölvupóst en ég mun líka bjóða það í smakkpakka ásamt öðrum góðum vínum er ekki fást í ÁTVR, fyrir jól.

Færðu inn athugasemd

Filed under firriato, tilboð, vínbúðirnar

La Spinetta fyrstur með 3 stjörnur á eftir Gaja

Bestu vín Ítalíu fá 3 glös, TRE BICCHIERI, á hverju ári í Gambero Rosso. Þegar framleiðandi hefur fengið alls 10 slíkar viðurkenningar fær hann eina stjörnu í hattinn, 2 stjörnur þegar hann nær 20 o.s.frv.

Aðeins tveir framleiðendur á Ítalíu hafa fengið 3 glösin eftirsóttu alls 30 sinnum.

Fyrstur var Gaja.

Annar var La Spinetta.

Það náðist núna í nýjasta Gambero Rosso fyrir árið 2007.

Moscato d’Asti 2005 og Barbera Ca di Pian 2003 frá La Spinetta fást í Kringlunni og Heiðrúnu. Barbera Superiore 2003 og Barolo 2001 er hægt að sérpanta hjá okkur.

Neal Martin lýsir því skemmtilega á wine-journal.com hvernig hann kynntist víni frá La Spinetta í fyrsta sinn auk þess sem hann fjallar um framleiðandann og gefur vínum hans einkunnir.

Færðu inn athugasemd

Filed under dómar, fréttir, gambero rosso, la spinetta, tre bicchieri

Hvers vegna litlir birgjar verða áfram litlir

ÁTVR blæs í lúðrana öðru hverju og heldur sérstaka þemadaga í Vínbúðunum. Hátíðarvín heitir svokallað síðasta þema ársins, það kemur á mikilvægum tíma þegar vín seljast mun meira en í öðrum mánuðum ársins.

Hver birgir fær að tilnefna ákveðið mörg vín á þessa daga og ræður því hvort hann gefur afslátt eða ekki.

ÁTVR gefur engan afslátt.

Stórir birgjar (10 kjarnavín eða fleiri) fá að tilnefna 6 vín en iltlir birgjar (færri en kjarnavín) eins og undirritaður fá einungis 6. Skiptar skoðanir eru um réttlæti þessarar skiptingar. Ég vil meina að það eigi ekki að miða við stærð heildsalans þegar úthlutaðar eru tilnefningar hátíðarvína heldur eigi allir að fá jafnt en því eru menn í ÁTVR ekki sammála. Þeim finnst rökrétt að stóru fái fleiri. Stóru birgjarnir vilja náttúrulega fá enn fleiri ef eitthvað er.

Hvort þetta er löglegt veit ég ekki.

Ég spyr: ef stórar birgjar fá fleiri tilnefningar út af því að þeir eru stórir, hvers vegna að draga mörkin í 6 á móti 3? Má ekki bara gefa hverjum birgja tilnefningar hlutfallslega eftir stærð. Þannig gæti Ölgerðin, Vífilfell og co stjórnað hátíðarvínum í ríkinu nánast að fullu.

Er ekki nóg að þeir stjórni vöruúrvali vínbúðanna frá degi til dags, mega hátíðarvín ekki skarta meiri fjölbreytni?

ÁTVR hvetur líka til þess að tilnefnd vín séu kjarnavín en ekki reynsluvín (reynsluvín fást bara í Heiðrúnu og Kringlunni). Það finnst mér skrítið því í reynslu leynast skemmtilegustu vínin sem ÁTVR hefur upp á að bjóða og hátíðarvín og slíkir dagar eiga einmitt að vera vettvangur fyrir þessi vín til að ná til viðskiptavina, t.d. úti á landi, sem ekki sjá slík gæðavín oft í sínum hillum.

Færðu inn athugasemd

Filed under röfl, tilboð, vínbúðirnar

Amedei súkkulaði

Amedei súkkulaðið snýr aftur. Það var reyndar aldrei hætt, en lagerinn kláraðist í vor og síðan höfum við Rakel þurft að narta í annars flokks súkkulaði (frekar, þriðja eða fjórða flokks).

Amedei er fyrsta flokks súkkulaði.

Bragðlaukurinn Ferran Adrià á El Bulli (Besti veitingastaður í heimi skv. Restaurant Magazine) segir Chuao súkkulaðið frá Amedei hugsanlega vera það besta í heimi eins og fram kemur í þessari grein í Food and Wine Magazine.

Við ætlum að efla nærveru Amedei súkkulaðis á Íslandi eftir að næsta sending kemur til landsins. Það er svo gott að annað er bara ekki hægt.

Færðu inn athugasemd

Filed under amedei, el bulli

Haustfundur hjá vínteyminu

Vínteymisfundur í höfuðstöðvunum síðastliðinn sunnudag.

Smökkuð voru 18 vín, þar af 10 sem við höfðum líka sent í business class vínsmökkun Flugleiða. Framleiðendurnir voru alls fjórir. Tvo flytjum við inn nú þegar, San Michele Appiano á Ítalíu og Artadi á Spáni. Sandhofer í Austurríki hef ég verið að smakka undanfarna 6 mánuði en Chateau de Montfaucon í Rhone í Frakklandi þekkt ég ekkert áður heldur höfðu þau samband með tölvupósti og sendu síðar sýnishorn þar sem mér leist vel á framleiðandann.

Hópurinn á vínteymisfundi hefur aldrei verið stærri, 10 smakkarar. Alltaf gaman en þessi fundur var sérstaklega góður.

Þetta var virkilega skemmtilegt og vínin voru yfir höfuð til fyrirmyndar. Upp úr stóðu líklegast Cabernet Sauvignon 2002  og Blaufrankisch 2004 frá Sandhofer, Pinot Nero 2004 frá San Michele Appiano og Cotes du Rhone Baron Louis 2003 frá Chateau du Montfaucon. Montefaucon línan var reyndar öll ótrúlega skemmtileg, t.d. hið venjulega Cotes du Rhone og hvítvínin tvö, ekki síst 100% Viognier.

Skoðaðu myndir frá smakkinu á flickr.com

Færðu inn athugasemd

Filed under appiano, artadi, myndir, vínsmökkun

Ansi gott vatn

Vínvörumerkjaslagurinn hefur farið sífellt harðnandi undanfarin ár með sífellt undarlegri nöfnum sem ætlað er að hrifsa athygli kaupandans ásamt tilheyrandi skraulega útfærðum flöskumiða. Líklegast var toppnum náð með s-franska vínmerkinu („brand“) Fat Bastard.

Hér er listi yfir nokkur ný merki, Mighty Good Water er eitt þeirra.

Þá geta menn líklegast sagt að vatn sé best, en samt meint vín – eða hvað? 

Færðu inn athugasemd

Filed under vangaveltur

The Redstripe Pressings — d’Arenberg fréttabréfið

Gaman að þessari d’Arenberg víngerð.

Enginn okkar framleiðanda stendur sig eins vel í markaðsmálum eins og d’Arenberg. Þeir senda allar vínfréttir jafnóðum í tölvupósti svo sem einkunnir o.sfrv. og gera það á skemmtilega hátt. Stemningin er alltaf á léttu nótunum, hvort sem er í formlegri texta á vefsíðunni eða einfaldlega í daglegum tölvupóstsamskiptum við Cindy, Claire og fleiri. Um jólin fengum við líka send dagatöl með skrípamyndum af 12 ólíkum vínum þeirra eftir 12 ólíka höfunda.

Stemningin endurspeglast ekki síst í frumlegum nöfnum vínanna og ekki má gleyma vínunum sjálfum sem eru frumleg og persónuleg.

Í morgun (nótt) kom póstur frá Claire þar sem hún var að láta viðskiptavini vita af nýjasta vínpóstinum þeirra The Redstripe Pressings.

Færðu inn athugasemd

Filed under ástralía, d'arenberg

Fontodi viðtal í Winejournal

Á www.wine-journal.com, vínbloggsíðunni hans Neil Martin, birtist þetta skemmtilega viðtal við Giovanni Manetti, eiganda Fontodi víngerðarinnar í Chianti Classico. Það var tekið fyrir um ári síðan, í miðri 2005 uppskerunni (ath. viðtalið og víngagnrýnin er á þremur síðum).

Viðtalið var liður í stærri umfjöllun um framleiðendur í Chianti Classico með tilheyrandi vínsmakki og einkunnum. Þessi inngangur að umfjölluninni er líka fróðlegur.

Fontodi kemur best út, eini framleiðandinn af 9 sem nær því að fá 23 stig af 25 fyrir eitthvert vína sinna og það gerir hann meira að segja tvisvar (Vigna del Sorbo 2001 og Flaccianello 2000).

Færðu inn athugasemd

Filed under ítalía, chianti classico, dómar, fontodi, Vínblogg, viðtal

Winelovers elska Tempier í Bandol

Einn prýðilegur vettvangur til að ræða um vín er á vefsíðunni hennar Robin Garr www.wineloverspage.com

Þema októbermánaðar er Bandol í S-Frakklandi en þar eigum við einn fulltrúa sem jafnan er nefndur sá besti á staðnum, Domaine Tempier.

Í innganginum hennar Robin að Bandol-umræðunni er Tempier einmitt fyrsta nafnið sem kemur upp, slíkt gerist eiginlega alltaf þegar rætt er um vín frá Bandol í jákvæðum tilgangi.

Skoðaðu listann yfir umræðuefnin í september og ágúst (Bandol umræðuþræðir eru efst á listanum)

Skoðaðu líka þessa skemmtilegu umræðu um rósavínið frá Domaine Tempier sem fór fram hjá Winelovers fyrr í sumar.

Færðu inn athugasemd

Filed under frakkland, tempier, vefsíður

Vín án matar

Craig Camp bloggar um vín á Winecamp.

Hann hefur flutt inn vín í Bandaríkjunum, búið á Ítalíu, skrifað blogg og framleiðir nú Pinot Noir í Kaliforníu. Honum er greinilega mjög annt um vín.

þessi setning sem hann fann á einum vinsælasta vín-umræðuvefnum fór fyrir brjóstið á honum:

“[A]nd to my palate even the best paired food gets in the way of a pure and unadulterated one-on-one experience with the wine”

Craig getur nefnilega vart hugsað sér vín án matar, eða mat án víns eins og fram kemur í þessu bloggi á vefsíðunni hans.

Einmitt, ekki vín án matar.

Heldur, vín og matur.

Færðu inn athugasemd

Filed under robert parker, spjallþræðir, vangaveltur, Vínblogg