Monthly Archives: janúar 2007

Pinot Noir Smakkpakki – 3 rauðvín frá Ítalíu

Það er ekki mörg Pinot Noir, eða Pinot Nero eins og Ítalarnir kalla hana, framleidd á Ítalíu. Það er því all gott að þrjú þeirra skuld vera að þvælast hér á Íslandi, tvö frá Appiano og eitt frá Fontodi.

Það er næg ástæða til þess að blása til Smakkpakka.

Pinot Nero Riserva 2001 frá Appiano hefur siglt hér um strendur í rúmt ár en er nú ófáanlegt fyrir utan nokkrar flöskur sem lúra á lagernum. Litla systirin Pinot Nero 2004, einnig frá Appiano, rak hér á strendur í lok desember og mun fást í Vínbúðunum eftir mánuð auk þess að prýða vínlista Icelandair Business Class USA næsta árið. Pinot Nero Case Via 2001 frá Fontodi er drottning þessari þriggja og lætur þess vegna aðeins sjá sig í litlu upplagi á veitingastaðinum La Primavera.

Smelltu hér til að lesa meira um Pinot Nero (og hundruðir annarra þrúgna)

„It’s a hard grape to grow … it’s thin-skinned, temperamental, ripens early … it’s not a survivor like Cabernet, which can just grow anywhere and thrive even when it’s neglected. No, pinot needs constant care and attention … it can only grow in these really specific, little, tucked-away corners of the world. And only the most patient and nurturing of growers can do it, really. Only somebody who really takes the time to understand pinot’s potential can then coax it into its fullest expression. Then, oh, its flavors, they’re just the most haunting and brilliant and thrilling and subtle and ancient on the planet.“ (Miles í Sideways)

Pinot Noir smakkpakkinn kostar 7.400 kr.

Sendu okkur tölvupóst á vinogmatur@internet.is til að panta.

Færðu inn athugasemd

Filed under appiano, ítalía, þrúgur, fontodi, smakkpakki

Dýra vínið – Le Vigne 1997 3L

.

Hún kostar 48.000 kr. og var seld í dag, dýrasta flaskan sem við höfum flutt inn hingað til. 3ja lítra flaska af Barolo Le Vigne 1997 frá Luciano Sandrone. Það gera 12.000 kr. per 750ml miðað við venjulega flöskustærð.

Er hún þess virði?

Að sjálfsögðu. Árgangurinn er frábær og vínið er með þeim bestu frá héraðinu. Svo má ekki gleyma því að aðeins um 100 flöskur eru framleiddar af þessari 3ja lítra útgáfu (svona 3ja lítra flösku kalla Ítalirnir „Imperiale“)

Fyrir áhugasama þá fæst Barolo Le Vigne í Vínbúðunum Heiðrúnu og Kringlunni. Ekki 3ja lítra flaska heldur venjuleg 750ml og ekki 1997 árgangur heldur 2000 og 2001. Hún kostar líka ekki nema 7.400 kr.

Svo má fá ódýrari útgáfu af rauðvíni úr sömu þrúgu (þ.e.a.s. Nebbiolo þrúgunni) frá Luciano Sandrone, Nebbiolo d’Alba Valmaggiore, á 3.390 kr. Eins konar mini-Barolo. Hún fæst líka í Heiðrúnu og Kringlunni.

Færðu inn athugasemd

Filed under luciano sandrone

Áfram Cheval Blanc 1964!

.

Áfram Ísland – tökum Þjóðverja í bóndabeygju á morgun!

En að öðru.

Eins og Cheval Blanc 1964.

Af rausnarskap vinar og vínsafnara áskotnaðist okkur flaska af þessu fágæta víni. Árgangurinn 1964 í Bordeaux var svona bland í poka þar sem vín úr Merlot gerðu það gott á meðan Cabernet Sauvignon fór illa. Framarlega meðal jafningja er Cheval Blanc 1964 (meirihluti Cabernet Franc og rest Merlot) sem Robert Parker gaf 96 stig, eitt besta vín þessa árgangar frá Bordeaux. Hann spáir því líftíma til 2025. Við vorum sjálf hlessa hversu unglegt og sprækt vínið var þótt erfitt sé að sjá fyrir sér frekar þroskun, hvað þá í næstum 20 ár til viðbótar – vínið er jú 42 ára!

Flaskan var vel fyllt upp í háls sem gaf til kynna að það hafði verið vel geymt þessa fjóra áratugi. Liturinn var appelsínubrúnn eins og við var að búast en all dökkur og líflegur. Við drukkum það með lambainnanlærisvöðva sem hafði verið nuddaður með rósmarín, oreganó, salti og pipar og ólífuolíu. Svona gamalt vín þolir ekki flóknari mat en það. Við vorum sátt við þetta vín vægast satt, það var ekki stórt í munni heldur elegant og nett, staldraði stutt við en skildi eftir langan hala. Frábært jafnvægi einfaldlega því aðeins nánast fullkomið vín er svona gott eftir svona langan tíma – ef fullkomið vín er til yfir höfuð. Skemmtileg sveitaelement eins og mold og tjara voru áberandi, nettur ávöxtur og sýra og tannín að sjálfsögðu samrunnin víninu eftir allan þennan tíma.

Á eftir smökkuðum við aðra Bordeaux blöndu en sú var frá Ítalíu. Cabernet Sauvignon og Merlot að hætti Bordeaux búa í bland við Aglianico – Montevetrano 2003. Bragðmikið vín og verulega flott sem malaði eins og köttur undir silkimjúkum hjúp. Nammi.

Síðan komu tveir árgangar af enn einni Bordeaux blöndunni, í þetta skiptið Cabernet Sauvignon, Merlot, Cabernet Franc og Petit Verdot frá d’Arenberg – nánar tiltekið Galvo Garage 2003 og 2004. 2004 var lokað með skrúftappa og þótti okkar það betra vín af tveimur verulega góðum. Verðið er sama og fyrir Laughing Magpie. Líklegast tökum við það inn í vor.

Arnaldo Caprai höfum við flutt inn í tvö ár en aldrei tekið sætvínið Sagrantino di Montefalco Passito enda fágætt vín sem okkur hefur einfaldlega ekki boðist fyrr. Það var svakalega ljúft, óvenju þurrt og létt miðað við sætvín og minnti að mörgu leyti frekar á þétt rauðvín. Frábært með súkkulaði (Amedei konfekt NOTA BENE).

Að lokum – tvær tegundir af grappa. Önnur vel kunnug, Rietine Grappa Chianti Classico, hin splúnkuný, Caprai Grappa Sagrantino di Montefalco. Rieitine er svona grappa hússins hjá okkur en Caprai er líklega álíka gott þótt það rífi aðeins meira í. En er það ekki einmitt það sem grappa á að gera?

Við byrjuðum reyndar á St. Valentin Sauvignon Blanc 2005 með hörpuskelfisk í kryddsmjöri. Um það er svo sem ekkert meira að segja en að þar er sígilt gæðahvítvín á ferðinni.

Færðu inn athugasemd

Filed under appiano, bordeaux, caprai, cheval blanc, d'arenberg, montevetrano, rietine, vínsmökkun

Sauvignon Blanc – kötturinn í grasinu

.

Ég var á rölti í vikunni á leiðinni heim í  kvöldmat þegar að allt í einu kom yfir mig þessa sterka löngun til að opna St. Valentin Sauvignon Blanc frá San Michele Appiano.

Ég fann hnífbeittan ilminn af þessari þrúgu, grænan, ferskan, sýruríkan og með sínu einkennandi kattahlandi.

Kattahlandi?

Já, það er merkilegt hvað kattahlandsilmur getur tekið á sig heillandi mynd þótt ég myndi kannski orða þetta frekar á hinn veginn og segja að það sé Sauvignon Blanc ilmur af kattahlandi en ekki öfugt.

Þegar maður kemst upp á lagið þá eru það fá hvítvín sem toga eins í mann eins og þau úr Sauvignon Blanc. Ilmurinn lokkar og bara tilhugsunin um ertandi sýruna setur munnvatnskirtlana í viðbragðsstöðu.

Uppruni þrúgunnar er yfirleitt  rakinn til Frakklands, ekki síst Loire héraðsins en í Bordeaux myndar hún uppistöðu í flestum hvítvínum þó oft í bland við Semillon. Síðan var það eftir vel heppnaðar tilraunir í Nýja Sjálandi fyrir um 30 árum að þrúgan komst rækilega á kortið.

Sauvignon Blanc hefur stuttan þroskaferil, bæði er líf hennar á vínviðinum stutt þar sem hún blómgast seint og þroskast snemma og almennt er talið að það sé ekki ráðlegt að geyma Sauvignon Blanc vín í mörg ár. Ég ætla þó að leyfa mér að efast aðeins um þetta síðara atriði og bíð spenntur eftir því að sjá hvernig St. Valentin Sauvignon Blanc frá Appiano þróast með árunum. Hún kýs líka fremur svalt loft og verður of þung og flöt í miklum hita.

Vín úr Sauvignon Blanc fá yfirleitt að vera í friði fyrir eikartunnum. Persónulega finnst mér það nánast alltaf löstur og kýs fremur óeikuð, hrein og tær Sauvignon Blanc vín.

Mamma!

Sauvignon Blanc á líka heiðurinn af því að færa okkur vinsælustu þrúgu í heimi, Cabernet Sauvignon, því hún ásamt Cabernet Franc eru foreldri þeirrar ágætu þrúgu.

Ég hef enn ekki smakkað betra Sauvignon Blanc en það frá St. Valentin Sauvignon Blanc frá Appiano nema ég myndi kannski setja að jöfnu eitt ofurljúft frá þeim Polz bræðrum í Austurríki.

2005 árgangur af St. Valentin Sauvignon Blanc er nýkominn og kostar 2.900 kr. í Heiðrúnu og Kringlunni. Það hefur ljúfan suðrænan ávöxt í bland við einkennin sem var lýst hér að framan.

4 athugasemdir

Filed under appiano, ítalía, þrúgur

Appiano er 100 ára í ár

.

San Michele Appiano víngerðin á 100 ára afmæli í ár. Afmælisveislan er í lok mars, síðustu dagana fyrir Vinitaly vínsýninguna og er okkur Rakel boðið. Skíði, matur og líklegast eitthvað af víni.

San Michele Appiano er vínsamlag í eigu yfir 300 bænda í sveitinni í kringum bæinn Appiano.

Það er því ólíklegt að við náum að taka í spaðann á þeim öllum.

Þeir eru samt örugglega að lesa bloggið og því segjum við bara – TIL HAMINGJU MEÐ AFMÆLIÐ!

Færðu inn athugasemd

Filed under appiano, vínsýning

Vínblogglistar – það var helst í fréttum

Winebloglist er dálítið sniðug vefsíða.

Hún sýnir lista af nokkrum helstu vínbloggsíðunum og vínfréttasíðunum. Fyrirsagnir af tveimur nýjustu færslum hverrar síðu eru birtar þannig að það er hægt að skanna hratt yfir hvað er þar helst í umræðunni og smella á það sem vekur áhuga manns til að lesa nánar á viðkomandi vefsíðu.

Wineblogwatch er aðeins öðruvísi. Hún sýnir nánast endalausan lista af vínbloggurum (fleiri hundruð!) en birtir ekki helstu fyrirsagnir.

Svo má líka bara láta sér nægja að lesa vín og matur bloggið.

Færðu inn athugasemd

Filed under fréttir, Vínblogg, vefsíður

Wine Spectator smakkar Chateau Flaugergues 2003 (vídeó)

.

Ég hef ekki farið eins mikið á Wine Spectator vefsíðuna eftir að þeir byrjuðu að rukka fyrir aðganginn en ein skemmtileg nýjung á síðunni kostar ekki neitt – vídeó af smökkunum, víngerð og fleiru.

Í vídeói sem kallast „Time to Shine in Southern France“ sýnir Kim Marcus fram á hversu góð víngerð er orðin í Languedoc héraðinu og smakkar þrjú vín , eitt rautt, eitt hvítt og eitt rósa, því til staðfestingar.

Rauðvínsfulltrúann könnumst við vel við, þar er okkar vín Chateau du Flaugergues 2003 á ferðinni en tímaritið gaf því 92 stig fyrir þann árgang. Greinlega verðugur fulltrúi héraðsins að þeirra mati.

Horfðu á Marcus smakka og lýsa víninu í vídeóinu.

Hann bendir m.a. á hversu vínið er fágað frekar en kröftugt.

Það á enn frekar við um 2004 árganginn sem er ekki eins sætur í nefi enda ekki eins heitt sumarið 2004 heldur vínið að sumu leyti jafnara. Litur og stíll minnir næstum á Pinot Noir frá Búrgúnd. Vínið er enn að opna sig og spái ég því að það gefa meira af sér í sumar heldur en nú. Það verður forvitnilegt að sjá hvað Wine Spectator segir um þennan árgang en ég spái því að hann nái ekki að jafna dóma þeirra um 2003 heldur hljóti svona 90 stig.

Færðu inn athugasemd

Filed under árgangar, dómar, flaugergues, frakkland, languedoc, sjónvarp, wine spectator

Rioja hvítvín fá að hafa Chardonnay og Sauvignon Blanc

Í þessari frétt á Decanter er fjallað um breytingu á vínlögum í Rioja sem gerir framleiðendum þar kleyft að bæta m.a. þrúgunum Chardonnay og Sauvignon Blanc í hvítvínin.

Einhverjar deilur eru um lagabreytinguna þar sem togast á hugsjónir þeirra sem vilja umfram allt viðhalda hefðinni og þar með útiloka aljþóðaþrúgur eins og Chardonnay og Sauvignon Blanc úr framleiðslu Rioja hvítvína – og þeirra sem finnst hefðin þrengja að sér og vilja því aukið frelsi til að framleiða hvítvín að sínu skapi.

Athugasemdir við fréttina á Decanter eru á báða bóga eins og við mátti búast. Ég sendi sjálfur mína skoðun á þessari frétt og birtist hún vonandi á Decanter eftir helgi. Ég er meira sammála skoðunum frjálshyggjumanna í þessum efnum eins og hans Alders (sem heldur úti Vinography vínblogginu) sem kallar á þessa breytingu „progress“ frekar en „evil globalization“.

Rauðvínin frá Rioja geta verið frábær en man einhver eftir eftiminnilegu hvítvíni frá Rioja sem hann hefur smakkað?

Svarið er örugglega nei. Ekki það að það sé ekki til einhvers staðar eitt og eitt gott hvítvín frá Rioja en líkurnar á að finna það eru hverfandi. Breytingin á lögunum verður líkleg til þess að bæta ímynd hvítvínanna. Hvort Chardonnay og Sauvignon Blanc séu endilega töfraþrúgurnar til að galdra fram góð Rioja hvítvín í framtíðinni skal látið ósagt (mér finnst reyndar Sauvignon Blanc meira spennandi kostur en Chardonnay í þessu sambandi) en aukiið svigrúm og skilningur fyrir viðleitni framleiðenda til þess að betrumbæta hefðina er skref í rétta átt. Verdejo, spánska þrúgan, er líka ný viðbót í þennan kokteil og lofar sú góðu þar sem hún er uppistaðan í prýðilegum hvítvínum frá Rueda.

Fram að þessu hefur Viura (einnig kölluð Macabeo) verið uppistaðan í Rioja hvítvínum, þrúga sem Oz Clarke kallað í bók sinni Grapes and Wines: „a grape which obstinately defies nearly all attempts to turn it into world-class wine.“ Hann nefnir á endanum nokka framleiðendur sem gera bestu vínin úr þrúgunni og er okkar framleiðandi í Rioja, Artadi, þar á meðal.

Við smökkuðum þetta Rioja hvítvín frá Artadi víngerðinni sem ber sama nafn og rauðvínið sem nú fæst í Vínbúðunum, Orobio. Það var prýðilegt en ekki eftiminnilegt og miðað við frábæra flóru rauðvína frá framleiðandanum olli það vonbrigðum. Kannski að Artadi nýti sér nýjar reglur til að endurskoða þetta vín – ég þarf að spyrja hann.

Færðu inn athugasemd

Filed under artadi, þrúgur, decanter, fréttir, rioja, spánn, víngerð

Decanter Wines of the Year 2006

.

Tvö af rauðvínunum okkar eru á lista Decanter tímaritsins yfir Bestu rauðvín ársins 2006: The Dead Arm 2004 frá d’Arenberg og Barolo Cannubi Boschis 2001 frá Luciano Sandrone.

LUCIANO SANDRONE CANNUBI BOSCHIS 2001 – 5 stjörnur
Big, closed, earthy, with vein of rose petal aromatics. Youthful, modern, brightly fruity, oak still dominant. Great depth of flavour. Drink 2008-16.

D’ARENBERG THE DEAD ARM 2004 – 4 stjörnur
Intense black- and blueberry, creamy oak, attractive. Jammy, richly fruited, linen-textured tannins, nice freshness, long. Drink up to 2011.“ (- Decanter)

Færðu inn athugasemd

Filed under ástralía, ítalía, d'arenberg, dómar, decanter, luciano sandrone

Thomas Keller býr til Gnocchi með sveppa- og graskerssósu: Vídeó

Við vorum að bæta tengli á Epicurious matar- og uppskriftavefinn á undir „Uppskriftir“.

Þar er t.d. hægt að nálgast þetta vídeó sem sýnir Thomas Keller búa til Gnocchi á franska vísu. Gnocchi er einstaklega meðfærilegur matur þar sem má skipta út kryddum að vild eða t.d. nota annan ost en þann franska sem Keller notar í þessari uppskrift. Við Rakel höfum t.d. notað brauð eða kartöflur í stað hveitisins sem Keller notar og parmeggiano í stað franska ostsins. Skoðaðu líka þetta vídeó til að sjá hann búa til sveppa- og graskerssósu út á Gnocchi-ið. Einföld tómatsósa (þ.e.a.s. úr ferskum tómötum og basiliku m.a.) klikkar heldur aldrei.

Thomas Keller er einn helsti ofurkokkur Bandaríkjanna með tvo veitingastaði, Per Se í New York og French Laundry í Kalíforníu, sem hafa þrjár Michelin stjörnur. Geri aðrir betur.

Færðu inn athugasemd

Filed under ítalía, frakkland, matur, pasta, sjónvarp, thomas keller, uppskrift, veitingastaðir

Vinography hlýtur vínbloggverðlaunin

.

Eins og fram kemur í þessari vikugömlu bloggfærslu þá datt einhverjum í hug að búa til verðlaun fyrir besta vínbloggið og fengu 5 bloggarar tilnefningu.

Nú er búið að veita verðlaunin og þau hlýtur Vinography.

Vinography er firnagott vínblogg skrifað af Alder. Þar er t.d. risalisti af vínbloggurum um allan heim, bókameðmæli og sitthvað fleira. Innihald bloggfærslanna sjálfra finnst mér reyndar mismunandi og síðan tek ég undir gagnrýni eins að það er pínulítið pirrandi að nánast öll vínin sem hann fjallar um fá 9 eða 9.5 í einkunn (vefsíðan er ekki yfirgripsmikil hvað fjölda gagnrýndra vína varðar) – en það er enginn spurning að hann er vandaður bloggar og vel að verðlaununum kominn.

Færðu inn athugasemd

Filed under blogg, verðlaun/viðurkenningar

Lascaux 2004 er Smart Buy í nýjasta Wine Spectator

Febrúarhefti Wine Spectator víntímaritsins kemur út innan skamms.

Þar fær Chateau du Lascaux 2004 89 stig og titilinn „Smart Buy“.

Við flytjum líka inn hið mjög svo góða Pic Saint Loup 2003 frá sama framleiðanda. Það eru jafnvel enn smartari kaup því aðeins 150 krónur skilja vínin að í verði (1.600 vs. 1.750 kr.) en munurinn er meiri að gæðum. Pic Saint Loup er bæði bragðfyllra og heilsteyptara vín.

Bæði vínin eru óeikuð, þroskuð í sementstönkum til að viðhalda spriklandi karakter frekar en löðra hann í eik.

Mmmm… best að taka eina Lascaux 2004 upp í kveld, þ.e.a.s. núna. Er reyndar djúpsteiktur smokkfiskur í matinn og brakandi hvítvín hentaði kannski betur enda Lascaux þurrt í munni þótt það sé aðeins sætt í nefi. En það er 7 stiga gaddur úti og manni veitir ekki af allri þeirri hlýju sem næst í.

CHATEAU DU LASCAUX COTEAUX DU LANGUEDOC 200489/100 „Smart Buy“
There’s an intense rush of bright cherry and berry flavors in this crisp, well-structured, medium-bodied red. Asian spice and iron notes are well-focused on the tight, tannic finish. Drink now through 2010.“ (Wine Spectator) 

[… var að ljúka matnum og passaði vínið mun betur með smokkfisknum en ég hafði reiknað með, eiginlega smellpassaði það en þó mæli ég með því svölu, svona 13-14°C. Rauðvín eins og þetta er greinilega upplagt með svona feitum fiskrétti, það klýfur fituna og heldur máltíðinni ferskri …]

4 athugasemdir

Filed under Chateau du Lascaux, dómar, verðlaun/viðurkenningar, wine spectator

Mest af andoxunarefnum í súkkulaði segir í Fréttablaðinu

.

Í Fréttablaðinu í dag er pistill um ágæti súkkulaðis  (allt – heilsa ofl. bls. 4) þar sem segir að rannsóknir hafi sýnt að súkkulaði í hóflegu magni sé í raun hollt. Þar er mælt með neyslu dökks súkkulaðis þrisvar til fjórum í viku en ekki of mikið í einu.

Takk fyrir það.

Ekki er sagt hvaðan rannsóknin kemur en ég bloggaði um álíka rannsóknarniðurstöður frá John Hopins Háskóla ekki alls fyrir löngu. Að þeirra mati hreinsar dökkt súkkulaði æðarnar.

Margir virðast vera sammála Fréttablaðinu, t.d. er hér ein gömul frétt um antioxidanta og súkkulaði.

Lestu líka um hollustu súkkulaðis á Wikipedia.

 70% Amedei súkkulaði fæst t.d. á öllum kaffihúsum Kaffitárs, hjá Kokku á Laugaveginum og í Fylgifiskum Suðurlandsbraut.

Færðu inn athugasemd

Filed under amedei, fréttablaðið, heilsa, súkkulaði

Top 11 söluhæstu vínin í desember

.

Hér eru 11 söluhæstu vínin okkar í Vínbúðunum í jólamánuðinum:

1. Fontodi Chianti Classico
2. d’Arenberg The Laughing Magpie
3. Castello di Querceto Chianti Classico Riserva
4. Castello di Querceto Chianti Classico
5. Falesco Vitiano Rosso
6. Umani Ronchi Casal di Serra
7. Firriato Santagostino Rosso
8. d’Arenberg The Hermit Crab
9. d’Arenberg The Footbolt
10. Chateau de Flaugergues Cuvee Sommeliere
11. Chateau de Mourgues du Gres Terre d’Argence

1-4, 6 og 8 fást öll í Kjarna (flestar vínbúðir) en hin fimm eru aðeins fáanleg í Heiðrúnu og Kringlunni.

Færðu inn athugasemd

Filed under ástralía, ítalía, castello di querceto, d'arenberg, falesco, flaugergues, fontodi, frakkland, mourgues du gres, umani ronchi, vínbúðirnar

Útsölufréttir

Um 100 flöskur eru farnar á útsölunni og þegar er ein tegund uppseld, Cignale 2001. Lítið er eftir af 1780 Remei og Artazu en önnur vín standa ágætlega.

Í fyrra seldust á þriðja hundrað flaska á janúarútsölunni og stefnir í að það verði svipað núna þegar uppi stendur en útsalan er út mánuðinn.

Samasem engin álagning er á þessum vínum  (þ.e.a.s. af okkar hálfu — þið getið reynt að biðja ÁTVR um að lækka sína!) og verður því vart neðar komist. Einhverjum gæti fundist afsláttur lítill miðað við annars konar útsölur hér í borg eins og fataútsölur sem auglýsa 50% afslátt — en það sýnir bara hvað það er lítil álagning á vínum yfir höfuð og hversu hlutur hins opinbera (áfengisgjald, umbúðagjald, pappagjald, vsk) er þar af leiðandi hár.

Hér er útsöluvínlistinn í heild sinni.

Færðu inn athugasemd

Filed under útsala, tilboð

5 bestu vínbloggin: 2006 Food Blog Awards

.

2006 Food Blog Awards tilnefningarnar eru komnar.

Þær eru heitari en Golden Globe.

Af tæknilegum ástæðum einum (skrifum ekki á ensku) er Vín og matur bloggið ekki í hópi 5 tilnefndra bloggara í flokkinu Best Drinks Blog en þessir eru það hins vegar.

Færðu inn athugasemd

Filed under blogg, fréttir

ÚTSALA — vínútsalan er hafin

Viðbrögðin við útsölunni fyrir ári síðan fóru fram úr væntingum. Ákveðin vín seldust upp áður en yfir lauk. Útsöluvínlistinn í ár er ekkert síðri.

Það sparast flestar krónur við það að kaupa Cignale (644 kr. miðað við afslátt plús 4% aukaafslátt) en afslátturinn er hlutfallslega mestur af Gotim Bru (ca. 19% miðað við afslátt plús 4% aukaafslátt)

Gotim Bru 2003 (rauðvín) 1.430 kr í stað 1.690
Casa de la Ermita 2001 (rauðvín) 1.510 kr. Í stað 1.690
Artazu 2004 (rauðvín) 1.170 kr. í stað 1.300
Cignale 2001 (rauðvín) 3.600 kr. í stað 4.100
1780 Remei 2001 (rauðvín) 2.600 kr í stað 2.900
Appiano Gewurztraminer 2004 (hvítvín) 1.710 í stað 1.950
Altavilla 2003 (rauðvín) 1.490 kr. Í stað 1.690
Belvedere 2003 (rauðvín) 1.490 kr. Í stað 1.690

Sendu okkur tölvupóst á vinogmatur@internet.is til að panta. Lágmarkspöntun er 6 flöskur og mega þær vera hver af sinni tegundinni.

4% aukaafsláttur er veittur ef keyptar eru 12 flöskur eða meira af sömu sort  — eða — 24 blandaðar flöskur og yfir.

Hrópið „vínútsala!“ yfir vinnustaðinn ykkar, og bendið áhugasömum á þennan lista!

Færðu inn athugasemd

Filed under útsala, tilboð